10:56 / 24.05.2021
10381

O‘zbekiston va Tojikiston o‘rtasidagi chegara demarkatsiyasi yakunlanmoqda

Tomonlar ikki davlat chegarasida chegara ustunlarini o‘rnatish jarayonini tezlashtirishga kelishib oldi.

Foto: aa.com.tr

Xo‘jandda 17-22 may kunlari O‘zbekiston va Tojikiston qo‘shma demarkatsiya komissiyasi doirasida Tojikiston va O‘zbekiston hukumat delegatsiyalari ishchi guruhlarining navbatdagi yig‘ilishi bo‘lib o‘tdi. Bu haqda «Aziya-Plyus» So‘g‘d viloyati rahbari ma'muriyatidagi manbaga asosan xabar berdi.

Muzokaralar davomida tomonlar ikki davlat chegara chizig‘idagi demarkatsiya ishlarini muhokama qildi, demarkatsiya liniyasi loyihasi va chegara chizig‘ida chegara belgilarini o‘rnatish bo‘yicha fikr almashdi.

Tomonlar umumiy chegarada demarkatsiya dala ishlarini tezlashtirishga kelishib oldi.

Manbaga ko‘ra, Toshkent va Dushanbe tarkibiga geodezistlar, kartograflar, TIV, chegara xizmatlari vakillari kiritilgan tegishli ishchi guruhlarga ikki davlat chegaralarida 2021 yil oxiriga qadar chegara ustunlarini o‘rnatish tartibini tasdiqlash to‘g‘risida ko‘rsatma bergan. 

Eslatib o‘tamiz, ikki davlat o‘rtasidagi davlat chegarasining to‘liq delimitatsiyasi 2019 yilda yakunlangan edi. 

Tomonlar o‘shanda chegara chizig‘i to‘g‘risida yozma ravishda kelishib olgan, endi davlat chegarasi demarkatsiyasi natijasida xaritalarda ikki davlat chegarasining aniq chizig‘i ko‘rsatiladi. 

O‘zbekiston va Tojikiston o‘rtasida o‘zbek-tojik davlat chegarasining ayrim uchastkalari to‘g‘risidagi bitim 2018 yil 9-10 mart kunlari O‘zbekiston prezidenti Shavkat Mirziyoyevning Dushanbega davlat tashrifi doirasida imzolangan. Tojikiston parlamenti ushbu shartnomani 2018 yil 19 aprelda ratifikatsiya qildi. 

Ma'lumotlarga ko‘ra, o‘zbek-tojik chegarasining uzunligi 1332 kilometrni tashkil qiladi. 

Top