Aziz Abduhakimov Turkiy kengashda Madaniy meros obektlarini asrash jamg‘armasini tuzishni taklif qildi

Yig‘ilishda so‘zga chiqqan O‘zbekiston bosh vaziri o‘rinbosari, turizm va sport vaziri Aziz Abduhakimov qator takliflarni ilgari surdi.

“Turkiy xalqlar odatiga ko‘ra – qarindoshlik aloqalarini ushlab turish uchun tez-tez mehmon bo‘lish, bir birini yo‘qlab borish an'anasi ota-bobolarimizdan qolgan.

Biz, bugun qardoshlik aloqalarini mustahkamlash va bir-birimizning uyimizda mehmon bo‘lish uchun mavjud savollarga javob topishimiz lozim.

Ruxsatingiz bilan quyidagi takliflarimni bildirib o‘tsam.

Birinchidan, Kengashga a'zo va kuzatuvchi davlatlar o‘rtasida transport logistika tizimini rivojlantirish dolzarb masala va bu umumiy manfaatlarimizga to‘liq mos keladi.

Buning uchun, shaharlar o‘rtasida muntazam va charter parvozlar tashkil qilish, turistik poyezd, avtobuslar qatnovini yo‘lga qo‘yish va sayyohlarning o‘z avtomobilida harakatlanishiga imkoniyat yaratishimiz lozim.

Ikkinchidan, davlatlarimiz turizm salohiyatini targ‘ib qilish ishlariga yangicha yondashishimiz zarur.

Poytaxt va turizm shaharlardagi aeroport va vokzallarda turizm ma'lumot markazlarini tashkil qilgan holda targ‘ibot materiallarini 24/7 rejimida joylashtirishni taklif qilaman.

Bundan tashqari, mahalliy telekanallarda turkiy xalqlar va mehmondo‘stlik to‘g‘risidagi ko‘rsatuvlarni doimiy ravishda efirga berib borishimiz kerak.

O‘zbekiston tomoni “Turizm 365”, “ UzReport” va “Tarix”, “Al-Buxoriy” xalqaro yo‘ldosh telekanalida Siz tomoningizda taqdim etiladigan dasturlarni joylashtirishga tayyorligimizni ma'lum qilamiz.

Uchinchidan, hozirgi kunda dolzarb bo‘lgan masala – madaniy meros obektlarimizni tiklash, restavratsiya qilish, qadimiy arxitekturasini yo‘qotmagan holda saqlab qolish, raqamlashtirish, samarali menejmentni joriy qilish va kelajak avlodga yetkazishdir.

Shu maqsadda, Turkiy kengash huzurida a'zo davlatlarning mablag‘i asosida Madaniy meros obektlarini asrash jamg‘armasini tashkil qilishni taklif etaman.

Jamg‘arma mablag‘lari birinchi navbatda Kengash a'zolari bo‘yicha to‘liq madaniy meros obektlari onlayn xaritasi – platformasi va raqamlashtirilgan nusxalarini yaratishga, turkiy davlatlarning madaniyati, tarixi, moddiy va nomoddiy me'rosi bo‘yicha amalga oshiriladigan ilmiy-amaliy izlanishlarga yo‘naltirilishi lozim.

To‘rtinchidan, turkiy davlatlarning yagona madaniy va turizm tadbirlari taqvimini yaratish taklifini bildirmoqchiman.

Unga ko‘ra, xalq o‘yinlari – etno sport (uloq-ko‘pkari, dorbozlik, kurash, kamondan o‘q uzish, tosh ko‘tarish kabi) va baxshilar musobaqasini o‘tkazib borish tarixiy an'analarimizning yo‘qolib ketishining oldini oladi.

Boburiylar sulolasi boshlangan qadimgi Axsikent qal'asi hududida “Turkiy ovoz” qo‘shiq va kuy festivalini tashkil etishni taklif etaman.

Beshinchidan, turoperatorlarning turizm bozorlariga kirib borishini qo‘llab-quvvatlashimiz va ular yordamida qo‘shma turlar tashkil qilishimiz barchamiz uchun manfaatlidir.

Oltinchidan, turizm ta'limi sohasida tajriba almashish va sohadagi mutaxassislarning doimiy malakasini oshirish, akademik turizmni yo‘lga qo‘yish zarur. Bunda, mamlakatlarimiz oliy o‘quv yurtlari o‘rtasida grant kvotalarini joriy qilish va ko‘paytirish lozim.

Chunki aynan yoshlarimizning bir-birlari bilan aloqalarini kuchaytirsak, ularning xalqlarimiz tarixi, merosi va hozirgi xayotiga o‘zaro qiziqishlarini orttirsak, shundagina hamkorligimiz kelajagi uchun mustahkam poydevor qurgan bo‘lamiz.

Yettinchidan, Turkiy kengash tomonidan taklif qilingan “Turizm poytaxti” tashabbusini qo‘llab-quvvatlashimizni ma'lum qilgan holda, uning vositasida hozirda mashhur turizm maskanlarini emas, balki sayyohlik potensiali yuqori bo‘lgan shaharlarni rivojlantirishimiz lozim.

O‘zbekiston tomoni Turkiy dunyo va xalqlarining rivojlanishida o‘zining alohida o‘rniga ega, Ipak yo‘li ravnaqiga muhim hissa qo‘shgan Qo‘qon shahri nomzodini ilgari suradi va sizdan mazkur shaharni Turkiy kengashning ilk turizm poytaxti sifatida qo‘llab-quvvatlashingizni so‘rab qolamiz.

O‘z navbatida, ishontirib aytamanki ushbu tashabbus doirasida shaharlarimiz o‘rtasidagi turizm aloqalarni har tomonlama kuchaytirishga qaratilgan amaliy chora-tadbirlar chiqiladi va muvaffaqiyatli amalga oshiriladi”, – dedi Aziz Abduhakimov.

Yig‘ilishda Qo‘qon shahrini Turkiy kengashning ilk turizm poytaxti deb e'lon qilish haqidagi taklif ma'qullandi.