Qashqadaryoda Matiz va Cobalt o‘zaro to‘qnashdi. Bir kishi vafot etdi, to‘rt kishi jarohatlandi

Qashqadaryo viloyati Koson tumanida sodir bo‘lgan yo‘l-transport hodisasida Matiz va Cobalt o‘zaro to‘qnashgan. Oqibatda bir kishi vafot etdi, to‘rt kishi jarohatlangan. Bu haqda viloyat IIB axborot xizmati xabar bermoqda.

Ma'lum qilinishicha, joriy yil 20 iyun kuni soat 8:30larda Koson tumani «Lolazor» MFY hududidan o‘tuvchi 4K339 avtomobil yo‘lining 4-kilometrida odam o‘limi bilan bog‘liq yo‘l-transport hodisasi ro‘y bergan. Oqibatda Matiz haydovchisi og‘ir tan jarohatlari olib vafot etgan. Cobalt haydovchisi hamda har ikkala mashinada yo‘lovchi sifatida ketayotgan fuqarolar turli darajada tan jarohatlari bilan shifoxonaga yotqizilgan.

Aniqlanishicha, haydovchilardan biri yo‘l harakati qoidalarini qo‘pol tarzda buzgan. U quvib o‘tish maqsadida qarama-qarshi yo‘nalishga chiqqan va ro‘parasidan kelayotgan mashina bilan to‘qnashgan.

Qayd etilishicha, mazkur holat yuzasidan Koson IIB tergov bo‘limi tomonidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilib, dastlabki tergov harakatlari olib borilmoqda.