Janubiy Koreyaning poytaxt hududida 12 iyuldan ijtimoiy masofalashuvning eng yuqori – to‘rtinchi darajasi kiritildi. Ushbu rejim nafaqat poytaxt Seul, balki Inchxon va qo‘shni Kyongido provinsiyasida ham amal qiladi.
Fuqarolarga shaxsiy aloqalarni minimumlashtirish, zaruratsiz gavjum joylarga bormaslik tavsiya qilingan. Shuningdek, soat 18ga qadar 4 kishigacha, 18dan keyin esa 2 kishigacha uchrashishga ruxsat berilgan.
Poytaxt hududi joylashgan mehmonxonalar to‘lishi 75 foizdan oshmasligi kerak. Sport musobaqalari tomoshabinlarsiz o‘tkaziladi. Bolalar bog‘chalari va maktablar 14 iyuldan onlayn rejimga o‘tkaziladi.
Kompaniyalar rahbarlariga o‘z xodimlarining 30 foizini masofadan ishlashga o‘tkazish tavsiya qilingan.
Cheklovlarning kuchaytirilishi koronavirus yuqtirish holatlari ko‘paygani bilaan bog‘langan. Mamlakatda o‘tgan hafta davomida mingdan ko‘proq kunlik kasallanish holatlari qayd qilingan.
