Bolgariyaning Qora dengizdagi eksklyuziv iqtisodiy zonasida ikkita savdo kemasiga dengiz va havo dronlari hujum qildi, deya maʼlum qildi mamlakat bosh vaziri Rumen Radev hodisa yuzasidan asosiy idoralar rahbarlari bilan oʻtkazilgan yigʻilishda. Ukraina prezidenti Volodimir Zelenskiy bu hujum Rossiya dronlari tomonidan amalga oshirilganini bildirdi.
Kemachilik sohasidagi manbalar Reuters agentligiga maʼlum qilishicha, bu – Bolgariya suvlaridagi birinchi shunday hujum boʻldi.
«Hujum oqibatida ikki kemaga zarba berildi», – degan Radev telemurojaatida. Kemalardan birining (unda gʻalla tashilayotgan edi) ekipaj aʼzolari qutqarib qolingan, ulardan ikki nafari jarohatlangan. Ikkinchi kema esa choʻkib ketgan (uning yuki haqida maʼlumot yoʻq), ekipaj aʼzolari bedarak yoʻqolgan deb hisoblanmoqda.
Dengiz xavfsizligi sohasidagi manba Reuters agentligi bilan suhbatda dastlabki hisob-kitoblar hujumlar Rossiya tomonidan amalga oshirilganini koʻrsatayotganini aytgan.
Radev hujum ortida kim turgani haqida gapirmagan, ammo Rossiyaning Ukrainadagi urushini tilga olib oʻtgan. «Agar bu urush oʻz vaqtida toʻxtatilmasa, u oʻzining geografik chegaralarini kengaytirishda davom etadi va hatto global mojaro xavfini oshiradi», – degan u.
Ukraina prezidenti Volodimir Zelenskiy Bolgariya sohillari yaqinida ikkita savdo kemasiga Rossiyaning dengiz va havo dronlari hujum qilganini aytdi.
«Ukraina mudofaa kuchlari dengizning bu hududida hech qanday amaliyot oʻtkazmagan, – degan Ukraina prezidenti. – Bolgariya tomoni bilan barcha maʼlumotlarga aniqlik kiritdik, harbiy-dengiz kuchlarimiz Bolgariyadagi hamkasblari bilan bogʻlandi. Bu Rossiyaning dengiz va havo dronlari orqali uyushtirgan qoʻshma hujumi ekani aniqlandi».
Zelenskiy kemalarga zarba berish orqali «Rossiya Qora dengizning gʻarbiy qismini qatnov uchun mutlaqo yaroqsiz holatga keltirishga boʻlgan urinishlarini davom ettirayotgani»ni taʼkidlagan.
Ukraina prezidenti Volodimir Zelenskiy Rossiyani makkajoʻxori olib ketayotgan fuqarolik kemasiga zarba berishda ayblaganidan bir kun oʻtib ham Moskva tomonidan izoh berilmadi.
Yevrokomissiya raisi Ursula fon der Lyayen bunday hujumlarga «toqat qilib boʻlmasligi»ni aytdi.
Radevning soʻzlariga koʻra, kemalarga hujum Bolgariyaning Byala shahridan taxminan 110 km sharqda tungi soat uchlarda roʻy bergan. Bitta kema choʻkib ketdi, ikkinchisi esa shikastlandi, deydi hukumat rahbari.
