Amerikada harbiy xizmatchi qatl etiladi, Litva yadroviy qalqon ilinjida – kun dayjesti

Namoyishlarga avval talabalar qoʻshildi. Keyin oʻrta maktab oʻqituvchilarining kasaba uyushmasi taʼlim xodimlarini oʻquvchilar yonida turishga, jumladan, ish tashlashga chaqirdi. Oʻsmirlarga nisbatan ommaviy hibslar va koʻzdan yosh oqizuvchi gaz qoʻllanishi ham ayrim ota-onalar va oʻqituvchilarning noroziligini kuchaytirdi. Kecha dehqonlar va energetika xodimlari uyushmalari ham oʻquvchilarni qoʻllab-quvvatlashga chiqdi.

6-oktabr harakatning eng katta kuni boʻldi. Rasmiylar namoyishchilar sonini 250 mingga yaqin, tashkilotchilar esa yarim millionga yaqin deb baholadi. Shu kuni butun mamlakatdagi litseylarda darslar hafta oxirigacha toʻxtatildi.

Ichki ishlar vazirligiga koʻra, namoyishlar boshlanganidan beri 6100 kishi hibsga olingan, ularning aksariyati 18 yoshga toʻlmaganlar. Adliya vazirligi 1800 dan ortiq kishi, jumladan, 1483 nafar voyaga yetmagan jinoiy javobgarlikka tortilishini maʼlum qildi. Kamida 215 oʻsmir va 85 xodim jarohatlangan.

Hukumat oʻquvchilarning talablari asosli, ammo zoʻravonlik qabul qilinmasligini taʼkidlamoqda. Razvedka idoralari harakatni soʻlchilar – "Boʻysunmas Fransiya" partiyasi siyosatchilari boshlaganini aytgan. Partiya buni rad etib, hukumatni saylov oldidan namoyishlarni siyosiylashtirishda aybladi. Fransiyada prezidentlik saylovigacha yetti oy qolgan.

Litvada yadro quroli joylashtirish masalasi

Litva 6-oktabr kuni oʻz hududida yadro qurolini joylashtirishga qoʻyilgan taqiqni bekor qilish sari yoʻl ochdi. Litva parlamentida 141 nafar deputatdan 106 nafari konstitutsiyaga kiritiladigan tegishli tuzatishni qoʻllab-quvvatladi. Islohot kuchga kirishi uchun tuzatish ikkinchi ovoz berishda ham qoʻllab-quvvatlanishi kerak.

Litva prezidentiga koʻra, siyosiy partiyalar bu qarorga kelishib olgan, ammo mamlakatda yadro qurolini joylashtirish boʻyicha bevosita rejalar yoʻq. Taqiqni bekor qilishdan maqsad – xavfsizlik bilan bogʻliq vaziyat oʻzgargan taqdirda hukumatda tezkor harakat qilish imkoni boʻladi. Litva, shuningdek, Yadro qurolini tarqatmaslik toʻgʻrisidagi shartnoma ishtirokchisi boʻlib qoladi.

Shu bilan birga, Litva AQShning doimiy harbiy bazasini tashkil etish bilan bogʻliq barcha xarajatlarni oʻz zimmasiga olishni taklif qildi. Prezident Donald Tramp Litvaning soʻrovini koʻrib chiqishini maʼlum qilgan: "Ular mening doʻstlarim, ular ajoyib insonlar, shuning uchun biz buni, albatta, koʻrib chiqamiz", dedi Tramp.

Rossiyaning Kaliningrad eksklavi va Belarus bilan chegaradosh boʻlgan ushbu mamlakat Yevropa Ittifoqi va NATO aʼzosi hisoblanadi. Prezident Vladimir Putin avvalroq Kaliningrad viloyatiga xavf tugʻilgan taqdirda, Rossiya ixtiyoridagi barcha harbiy arsenaldan foydalanishini aytgandi.

Amerikada harbiy qatl etilmoqda

Amerikalik ofitser Nidal Hasanga nisbatan chiqarilgan harbiy sudning oʻlim jazosi ijro etiladigan boʻldi. 2009-yilda 13 kishini otib oʻldirgan va 32 kishini yaralagan sobiq harbiy – shifokor-psixiatrning qatl etilishiga AQSH prezidenti Donald Tramp ruxsat berdi.

56 yoshli Hasanni otib oʻldirish orqali qatl etish taklifini mudofaa vaziri Pit Hegset kiritgan, Tramp uning tavsiyasini qoʻllab-quvvatladi. Qatl vaqti va joyini Pentagon rahbari belgilaydi.

Ayblovga koʻra, amerikalik Nidal Hasan 2009-yil 5-noyabr kuni Fort-Xud bazasida tibbiy koʻrikdan oʻtish uchun yigʻilgan qurolsiz xizmatdoshlariga qarata oʻq uzgan. Politsiyachilar javob oʻqi bilan Hasanni yaralagan, oʻshandan beri uning oyoqlari shol boʻlib qolgan.

2013-yilda Nidal barcha 32 ta ayblov bandi boʻyicha aybdor deb topilgan, harbiy tribunal uni bir ovozdan oʻlim jazosiga hukm qilgandi. Sud ushbu jinoyat "Al-Qoida"dan ilhomlanib sodir etilgan deb topdi.

Agar hukm ijro etilsa, bu 1961-yildan beri amerikalik harbiy xizmatchining ilk qatl etilishi boʻladi.

Ruminiyada kema halokati

Dushanba kuni Qora dengizdagi Ruminiya kemasida chiqqan yongʻin oqibatida ikki kishi halok boʻldi, boshqa yoʻlovchilar qutqarib qolindi.

Ruminiya Ichki ishlar vazirligi choʻkib ketgan kemaning 11 nafar ekipaj aʼzosi qutqarilganini maʼlum qildi. Mamlakatning Dengiz boshqarmasi voqea "Royad Mammadov" kemasidagi yongʻin bilan bogʻliqligini bildirdi.

Ruminiya yongʻin sabablariga izoh bermadi. Ammo Ukraina prezidenti Volodimir Zelenskiy bunga Rossiya dronlari sabab boʻlganini aytdi.

"Turkiyaga tegishli boʻlgan va makkajoʻxori tashiydigan, neytral suvlardagi fuqarolik kemasiga Rossiyaning ikki droni dahshatli zarba bergan. Bortda Ozarboyjon va Hindiston fuqarolari boʻlgan", deb yozdi Zelenskiy.

Rossiya rasmiylari bu holatga darhol izoh bermadi. Rossiya Mudofaa vazirligining kunlik byulletenida avvalroq ikkita yuk kemasiga zarba berganini aytgandi.

Maʼlumotlarga koʻra, Sent-Kits va Nevis bayrogʻi ostida suzayotgan kema Italiyaga yoʻl olgan va oxirgi marta Ukrainaning Izmail portida toʻxtab oʻtgan.