Qashqadaryoda giyohvandlik o‘simliklarini o‘stirib kelayotgan shaxslar ushlandi

Qashqadaryo viloyati Kitob tumanida qonunga xilof ravishda giyohvandlik o‘simligini parvarishlab kelayotgan ikki nafar shaxs ushlangan. Bu haqda tuman hokimligi axborot xizmati xabar bermoqda.

Ma'lum qilinishicha, Kitob tumani DXX hamda IIB hamkorligida o‘tkazilgan «Qoradori – 2021» profilaktik tadbirlari davomida tumandagi «Qatorbog‘» MFY yashovchi 1996 yilda tug‘ilgan G.T.ning yashash xonadoni ko‘zdan kechirilganda 7 tup kannabis o‘simligini qo‘lbola yashiklarda yetishtirib kelayotganligi aniqlangan va ular xolislar ishtirokida rasmiylashtirib olingan.

Shuningdek, tumanning «Varganza» MFY istiqomat qiluvchi S.M.xonadoni ham tekshirilganda qonunga xilof ravishda 4 tup kannabis o‘simligini o‘stirib kelayotganligi aniqlanib, hujjatlashtirilgan.

Qayd etilishicha, yuqoridagi har ikki holat yuzasidan Kitob tumani IIB huzuridagi Tergov bo‘limi tomonidan jinoyat ishi qo‘zg‘atilib, dastlabki tergov harakatlari olib borilmoqda.