Toshkentda koronavirusga qarshi vaksinani sotmoqchi bo‘lgan shaxslar ushlandi

Qayd etilishicha, 2021 yil 6 iyul kuni M.M. IIV JQBB boshlig‘i nomiga ariza bilan murojaat qilib, o‘z arizasida Z. ismli shaxs internet ijtimoiy tarmog‘idagi «Telegram» messenjeri orqali davlat tomonidan bepul emlash uchun berilgan Covid-19’ga qarshi vaksinani sotayotgani haqida e'lon bergani hamda ushbu shaxsga nisbatan qonuniy chora ko‘rishni so‘ragan.

Mazkur arizaga asosan, joriy yil 8 iyul kuni IIV JQBB Korrupsiya va iqtisodiy jinoyatlarga qarshi kurashish boshqarmasi xodimlari tomonidan Toshkent shahar, Uchtepa tumani, Lutfiy ko‘chasida joylashgan «Gurman» kafesi ro‘parasida tezkor tadbir o‘tkazilib, tadbir jarayonida fuqaro A.Z. fuqaro M.Ya.ga 186 dona «Covid-19 Yangi koronavirus recombinant vaksinasi (CHO hujayrasi) ZF-UZ VAC2001»ning har bir dozasini 150 000 so‘mdan, jami 27 750 000 so‘mga sotishga kelishib, ushbu pullar hisobidan 1 400 AQSh dollarini olgan vaqtida ashyoviy dalillar bilan ushlandi.

O‘tkazilgan surishtiruv davrida, A.Z. ushbu vaksinalarni Toshkent shahar Yakkasaroy tumanida joylashgan oilaviy poliklinikalardan birida katta hamshira bo‘lib ishlovchi B.S.dan olgani aniqlangan.

Mazkur holat yuzasidan Yakkasaroy tumani IIO FMB huzuridagi tergov bo‘limi tomonidan A.Z. hamda B.S.ga nisbatan Jinoyat kodeksining 186-3-moddasi 2-qismi «b» bandi bilan jinoyat ishi qo‘zg‘atilib, tergov harakatlari olib borilmoqda.