Olimpiada sovrindorlari murabbiylari va barcha ishtirokchilarga ham pul mukofoti beriladi

Tokio Olimpiadasida ishtirok etgan o‘zbekistonlik sportchilar va murabbiylarning barchasi pul mukofoti bilan taqdirlanadi. Kun.uz muxbiri xabar berishicha, olimpiyachilar bilan uchrashuvda prezident Shavkat Mirziyoyev sportchilarning nufuzli musobaqadagi ishtirokini yuqori baholab, ularning barchasi munosib taqdirlanishini ta'kidlagan.

«Albatta, jahonning eng yirik sport musobaqasi bo‘lmish Olimpiya o‘yinlarida ishtirok etishning o‘zi katta sharaf va mas'uliyat.

Buni barchamiz yaxshi tushunamiz. Buning uchun qancha og‘ir dovonlardan, mashaqqatli sinovlardan o‘tish talab etiladi.

Biz Olimpiadaning g‘olib va sovrindorlari, ularning trenerlari hamda barcha ishtirokchilarni munosib taqdirlashga qaror qildik.

O‘zbekistonda Olimpiada oltin medali sohiblari – 200 ming AQSh dollaridan, bronza medali egalari – 50 ming AQSh dollaridan mukofot puli bilan taqdirlanishi belgilab qo‘yilgan.

Sportchilarimizni murosasiz bellashuvlarga tayyorlashda erta-yu kech ular bilan birga bo‘lgan jonkuyar murabbiylarning xizmatlarini alohida ta'kidlashni istardim.

Bugun g‘olib va sovrindor sportchilarimizni tayyorlashda chinakam fidoyilik ko‘rsatgan To‘lqin Qilichev, Pavel Xan, Farhod Mirzajanov, Nurali Qobulov, Muzaffar Abdurahmonov kabi tajribali murabbiylarning nomlarini chuqur hurmat bilan tilga olamiz.

Biz Olimpiya chempionlarining trenerlarini – 40 ming AQSh dollaridan, bronza medal sohiblarining murabbiylarini 20 ming AQSh dollaridan mukofotlashni lozim deb topdik», dedi prezident.

Shavkat Mirziyoyev shuningdek, olimpiada o‘yinlariga yo‘llanma olish va ishtirok etish ham sportchidan katta mehnat talab etishini inobatga olgan holda, ular ham taqdirlanishga munosib ekanini ta'kidladi.

«Olimpiadada ishtirok etgan har bir sportchi ko‘p yillik og‘ir tayyorgarlik jarayonidan o‘tishini ko‘z oldimizga keltirsak, ular ham bugun g‘oliblar qatorida taqdirlanishga munosib ekaniga amin bo‘lamiz.

Shuni hisobga olgan holda, bu sportchilarimizning har birini 5 ming AQSh dollari miqdoridagi pul mukofoti bilan rag‘batlantirishga qaror qildik», dedi davlat rahbari.