Ashraf G‘ani va Abdulrashid Do‘stum O‘zbekistondaligi haqidagi xabarlar yana bir bor rad etildi

O‘zbekiston hududida Afg‘onistonning ayrim arboblari va etnik guruh rahbarlari bo‘lib turgani yo‘q. Bu haqda «Dunyo» axborot agentligi ma'lum qildi.

«So‘nggi paytlarda ommaviy axborot vositalari va ijtimoiy tarmoqlarda Afg‘onistonning ayrim arboblari va etnik guruhlari rahbarlari O‘zbekiston hududida bo‘lib turgani to‘g‘risidagi xabarlar tarqatilmoqda. Xususan, ularda Ashraf G‘ani, Abdulrashid Do‘stum, Ato Muhammad Nur va boshqalarning nomlari tilga olinmoqda.

Rasmiy ma'lumotlarga ko‘ra, bunday xabarlar haqiqatga to‘g‘ri kelmaydi», deyiladi xabarda.

15 avgust kuni toliblar Kobulni qurshab olgach, 2014 yildan buyon mamlakatga rahbarlik qilib kelgan prezident Ashraf G‘ani samolyot orqali Afg‘onistonni tark etgandi, ammo u qayerdaligi hamon noma'lum. OAVda u Markaziy Osiyo mamlakatlaridan biriga yo‘l olgani aytilgandi.

New York Times nashri Dohadagi muzokaralarda ishtirok etayotgan afg‘on delegatsiyasi vakillaridan biriga asoslangan holda G‘ani turmush o‘rtog‘i hamda ikki maslahatchisi bilan birga O‘zbekistonga uchganini aytgandi. Keyinroq prezidentning shaxsiy tansoqchisi Al-Jazeera telekanaliga G‘ani Toshkentga uchganini tasdiqladi.

Ammo O‘zbekiston ham, Markaziy Osiyoning yana ikki davlati Tojikiston va Qozog‘iston ham G‘ani ushbu mamlakatlardan biriga kelgani haqidagi xabarlarni rad etdi.

OAVda, u Ummon sultonligida bo‘lishi mumkinligi haqida xabarlar tarqalgan.

Shuningdek, 15 avgustga o‘tar kechasi Afg‘oniston shimolidagi Mozori Sharif shahri himoyasida qatnashgan o‘zbeklar yetakchisi Abdulrashid Do‘stum va ushbu hududdagi tojiklar yetakchisi Ato Muhammad Nur ham vertolyot orqali O‘zbekiston hududiga chekingani haqida xabarlar tarqalgandi.