«Tolibon» AQSh ustidan g‘alaba qozonilganini e'lon qildi

Toliblar bayonotiga ko‘ra, Afg‘oniston xalqi «ketma-ket uch asr davomida uch imperiya» ustidan g‘alabaga erishdi.

Afg‘onistonda mustaqillik kuni bayrami nishonlanayotgan payshanba kuni «Tolibon» harakati AQSh ustidan g‘alaba qozonilganini e'lon qildi, deb xabar berdi CNN telekanali.

«Allohga hamd-sanolar bo‘lsin, bugun biz Britaniya istilosidan mustaqillikka erishganimizni nishonlayapmiz (1919 yildagi uchinchi ingliz-afg‘on urushi yakunlari bo‘yicha – tahr.), shu bilan birga, Xudoning marhamati va jihod qarshiligi bilan boshqa bir qudratli va takabbur kuchni yengdik va Afg‘onistonning pokiza yeridan chiqib ketishga majbur qildik», — deyiladi «Tolibon» bayonotida.

Toliblar bayonotiga ko‘ra, Afg‘oniston xalqi «ketma-ket uch asr davomida uch imperiya» ustidan g‘alabaga erishdi. CNN aniqlik kiritishicha, bular Buyuk Britaniya, SSSR va AQShdir.

15 avgust kuni «Tolibon» harakati Afg‘onistonda hokimiyatni egalladi. Mamlakat prezidenti Ashraf G‘ani va boshqa qator amaldorlar Afg‘onistonni tark etdi.

Tayyorlagan: Дилшод Аскаров

#Tolibon