Afgʻonistonda «Tolibon» hukumati tomonidan qabul qilingan politsiya (Shoʻrta) toʻgʻrisidagi yangi qonun kuchga kirdi. Hujjat mamlakatda har qanday namoyishlarni oʻtkazishni birinchi marta qonun darajasida toʻliq taqiqlaydi va ayni paytda xavfsizlik kuchlarining vakolatlarini sezilarli darajada kengaytiradi.
Shoʻrta toʻgʻrisidagi qonun «Tolibon» yetakchisi Haybatulloh Oxundzoda tomonidan maʼqullanib, 2026-yil 22-avgustda rasmiy gazetada eʼlon qilingan. Hujjat 53 moddadan iborat boʻlib, uning ijrosi Ichki ishlar vazirligiga yuklatilgan.
Afgʻoniston hududida har qanday namoyishlarni taqiqlovchi 50-modda asosiy yangilik boʻldi. Qonunda hukumatning miting yoki ommaviy aksiyalar oʻtkazishga ruxsat berishi mumkin boʻlgan istisno yoki shartlar koʻzda tutilmagan.
Shu bilan birga, hujjat «Tolibon» hukumati politsiya oʻrniga «Shoʻrta» deb ataydigan tuzilmaning vakolatlarini kengaytiradi. Xodimlarga fuqarolarning shaxsini aniqlash, odamlarni soʻroqqa chaqirish, gumonlanuvchilarni hibsga olish, tintuv oʻtkazish va kuzatuv olib borishga ruxsat beriladi.
Qonun, shuningdek, kuch ishlatish tartibini ham batafsil belgilab beradi. Hujjatga koʻra, xavfsizlik kuchlari ixtiyorida suv purkagichlar, qalqonlar, tayoqlar, toʻsiqlar, qurol-yarogʻ va portlovchi moddalar mavjud. 39-moddada xodimlarning qaysi holatlarda qurol qoʻllashi mumkinligi belgilangan.
Yangi qonun «Tolibon» 2021-yilda hokimiyatga qaytganidan soʻng Afgʻonistonda amalda boʻlgan cheklovlarni qogʻozda mustahkamlaydi. Soʻnggi yillarda hukumat norozilik aksiyalarini, ayniqsa, oʻz huquqlarining cheklanishiga qarshi koʻchalarga chiqqan ayollar namoyishlarini bir necha bor bostirgan edi.
