Saylovchilarga interfaol xizmatlar orqali o‘z saylov uchastkasini aniqlash va o‘zgartirish imkoniyati yaratiladi

Bugun, 20 avgust kuni Markaziy saylov komissiyasining navbatdagi majlisida «Saylov uchastkasini aniqlash va o‘zgartirish bo‘yicha interfaol xizmat ko‘rsatish tartibi to‘g‘risida»gi nizom tasdiqlandi.

Kun.uz muxbirining xabar berishicha, ushbu nizom bilan O‘zbekiston fuqarolarining konstitutsiyaviy huquqlari amalga oshirilishiga sharoit yaratish hamda saylov jarayoniga zamonaviy axborot-kommunikatsiya texnologiyalarini joriy etish maqsad qilingan. Interfaol xizmat ko‘rsatish tartibi orqali fuqarolar o‘z saylov uchastkasini aniqlash va o‘zgartirishlari mumkin bo‘ladi. Xizmat yaqin kunlarda ishga tushiriladi.

Majlisda qayd etilishicha, hozirga qadar akkreditatsiyadan o‘tkazilgan mahalliy OAV vakillari soni 750 nafardan oshgan. Ularning 550 nafari televidenie, 110 nafari internet nashrlari vakillari. Bugungi yig‘ilishda ham 48 nafar mahalliy va 48 nafar xorijiy OAV vakillari MSK qaroriga muvofiq akkreditatsiyadan o‘tkazildi.

Shuningdek, Toshkent viloyati davlat hokimiyati vakillik organlari deputatlarining bo‘shab qolgan o‘rniga O‘zbekiston Respublikasi Oliy Majlis Senati a'zosi saylovi bo‘yicha qo‘shma majlis 2021 yil 24 avgust kuni Qibray tumanida joylashgan Toshkent davlat agrar universiteti binosida chaqirilishi ma'lum qilindi.