16:18 / 11.09.2021
23533
Роналдуда камбэк, «Сити» Суперкубок реванши илинжида, Гризманн ва Суарес Каталонияга, «Реал» «Бернабеу»га қайтмоқда. Ҳафта ўйинлари анонси

ФИФА кунлари сабабли юзага келган қарийб икки ҳафталик танаффусдан кейин еврофутбол ихлосмандлари интизорлик билан кутган кучли бешлик чемпионатлари яна ўз йўлида давом этади. Ҳафтанинг дам олиш кунлари Англияда Роналдунинг «Олд Траффорд»га қайтиши, Италияда «Юве»нинг Неаполдаги сафари ва Шомуродов ўйини, Испанияда «Реал»нинг уйига қайтиши, Германияда эса Нагельсманнинг «Лейпциг»га қарши ўйини мухлислар диққат марказида бўлади.

Англия: «Олд Траффорд» Роналдуни кутмоқда, «Сити» Суперкубокдаги мағлубият учун реванш илинжида

Бугун, 11 сентябрь куни Англияда старт оладиган турни Криштиану Роналду номи билан аташ мумкин. 12 йилликдан сўнг «Манчестер Юнайтед»га қайтган португалиялик юлдуз «Ньюкасл»га қарши ўйинда «Олд Траффорд»да иккинчи дебютини ўтказиши кутилмоқда. Ўйин олди матбуот анжуманида «МЮ» бош мураббийи Оле-Гуннар Сульшер Роналдунинг майдонга тушишини тасдиқлади. «Орзулар театри» дея ном олган ўйингоҳ ўтган бир ҳафта давомида рекорд миқдорда сотилган Роналдунинг либосига бурканиши аниқ. 7-рақамни Каванидан олган Роналду шу куни асосий таркибда ҳам уругвайлик форвард ўрнини эгаллайдими ёки захирадан майдонга тушадими, буни ўйинда билиб оламиз.

АПЛ. 4-тур.

11 сентябрь (шанба)

МЮ – НЬЮКАСЛ

Ўйин бошланиш вақти: 19:00

ТВ-трансляция: UzReportTV

Яна бир марказий баҳсда «Лестер» ўз майдонида «Манчестер Сити»ни қабул қилади. Гвардиола жамоаси мавсум аввалида Англия Суперкубоги учун баҳсда «тулкилар»дан учралган мағлубият учун реванш олиш имкониятига эга. Турнир жадвалида бир хил – 6 очкодан жамғариб ёнма-ён бораётган клублар ўртасидаги баҳс шиддатли тус олиши аниқ. Кўрамиз, Рожерс шогирдлари «шаҳарликлар» устидан эришилган Суперкубокдаги ғалаба тасодиф эмаслигини исботлай олишармикан?

АПЛ. 4-тур.

11 сентябрь (шанба)

ЛЕСТЕР – МАНЧЕСТЕР СИТИ

Ўйин бошланиш вақти: 19:00

ТВ-трансляция: FutbolTV

АПЛ 4-тур ўйинлари:

11 сентябрь (шанба)

16:30. Кристал Пэлас - Тоттенҳэм

19:00. Манчестер Юнайтед – Ньюкасл

19:00. Лестер - Манчестер Сити

19:00. Арсенал – Норвич

19:00. Брентфорд – Брайтон

19:00. Саутҳемптон - Вест Ҳэм

19:00. Уотфорд – Вулверҳэмптон

21:30. Челси - Астон Вилла

12 сентябрь (якшанба)

20:30. Лидс – Ливерпуль

13 сентябрь (душанба)

22:00. Эвертон – Бёрнли

Испания: «Реал» «Сантьяго Бернабеу»га қайтади, Гризманн ва «Атлетико» Каталонияда меҳмон

АПЛда бўлгани каби Ла Лигада ҳам ушбу турда яна бир дайди ўғлоннинг қайтиши кузатилади – Гризманн яна «Атлетико» либосини кияди. Айнан ушбу трансфер Симеоне жамоасининг чемпионлик учун курашда бу сафар ҳам «Реал» ва «Барса»дан кўпроқ имкониятга эга бўлишини таъминлаётгандек. «Атлетико» бу турда якшанба куни Каталонияда «Эспаньол» меҳмони бўлади. Шу куни мадридликлар ҳужум чизиғида Суарес – Гризманн тандемини кўрсак ажабмас.

Ла Лига. 4-тур

12 сентябрь (якшанба)

ЭСПАНЬОЛ – АТЛЕТИКО

Ўйин бошланиш вақти: 19:00

ТВ-трансляция: FutbolTV/UzReportTV

«Реал» ниҳоят бир йиллик танаффусдан кейин яна ўз уйи - «Сантьяго Бернабеу»га қайтади. Шу куни мадридликлар «Сельта»га қарши саф тортишади. Ўйингоҳ реконструкцияси тўлиқ якунига етмаган бўлса-да, «қироллик клуби» «Альфредо ди Стефано» стадионидан яна жонажон аренасига қайтадиган бўлди. Бу Анчелотти жамоасига қай даража ёрдам бера олади, якшанба оқшомидаги баҳсда кўрамиз.

Ла Лига. 4-тур

12 сентябрь (якшанба)

РЕАЛ – СЕЛЬТА

Ўйин бошланиш вақти: 23:55

ТВ-трансляция: FutbolTV/UzReportTV

Дарвоқе, «Барселона»нинг «Севилья»га қарши ўйини жанубий америкалик футболчилар ЖЧ-2022 саралаш босқичидан кечроқ қайтишлари сабабли номаълум муддатга қолдирилган.

Италия: «Наполи» «Юве»ни қабул қилади, «Рома» «Сассуоло»га қарши

Италия А Сериясида турнинг марказий учрашуви Неаполда ўтади. Икки учрашувда 6 очко жамғарган Спалетти бошқарувидаги «Наполи» Роналдусиз қолган «Ювентус»га қарши саф тортади. Устига-устак Массимилиано Аллегри «Наполи»га қарши ўйинда саккиз нафар футболчиси хизматидан фойдалана олмайди. Шу куни туринликларга Федерико Кьеза ва океан ортидан кечроқ қайтган Пауло Дибала, Хуан Куадрадо, Алекс Сандро, Данило ва Родриго Бентанкур ёрдам бера олмайди. Кьеза Италия миллий жамоаси иштирокидаги ўйинда жароҳат олди, Артур ва Кайо Хорхеда ҳам жароҳат бор. А Сериядаги ўтган икки турда бир очко жамғарган «Юве» учун бу баҳс ҳам яна бир жиддий синовга айланади.

Шунингдек, «Милан» «Сан-Сиро»да «Лацио»га қарши майдонга тушса, «Рома» якшанба оқшомида «Сассуоло»ни қабул қилади. Жозе Моуриньо римликлар сафида Элдор Шомуродовни майдонга тушириши кутилмоқда.

А Серия. 3-тур

11 сентябрь (шанба)

НАПОЛИ – ЮВЕНТУС

Ўйин бошланиш вақти: 21:00

ТВ-трансляция: SportTV

12 сентябрь (якшанба)

РОМА – САССУОЛО

Ўйин бошланиш вақти: 23:45

ТВ-трансляция: SportTV

Германия: Нагельсманн ва «Бавария» «Лейпциг»га қарши

Бундеслига 4-турининг марказий тўқнашуви Лейпцигда маҳаллий жамоа ва «Бавария» ўртасида кечади. Бугунги баҳсда Мюнхен жамоасини Юлиан Нагельсманн ўзининг собиқ клубига қарши бошлаб тушади. «Буқалар»ни янги даражага олиб чиққан ёш мураббий энди уларни мағлуб этиш илинжида. Жесси Марш қўл остидаги мезбонлар «Бавария»ни мағлуб этиб, уч йиллик нохуш анъанани бузиш имкониятига эгалар. Бу қанчалик рўй беради, шиддат ваъда қилаётган тўқнашувда кўрамиз. 

Бундеслига. 4-тур

11 сентябрь (шанба)

ЛЕЙПЦИГ – БАВАРИЯ

Ўйин бошланиш вақти: 21:30

ТВ-трансляция: МатчТВ Футбол

Франция: «ПСЖ» Месси ва Неймарсиз ўйнайди

Лионель Месси Францияга кўчиб ўтгач, «ПСЖ» иштирокидаги учрашувлар ҳафта ўйинлари қаторидан жой олаётгани табиий ҳолат. Аммо бу сафар Париж клубига Месси ҳам, Неймар ҳам ёрдам бера олмайди. Турнир дебютанти «Клермон»га қарши баҳсда Почеттино Месси, Неймар, Ди Мария ва Леандро Паредес сингари ўйинчиларни майдонга тушира олмайди. Жанубий америкалик ўйинчилар жума куни клублари ихтиёрига қайтгани учун клуб бу ўйинчиларга дам беришга мажбур. Ушбу йўқотишлар дебютантга сенсацион ғалаба умидини берган бўлса ажабмас.

Франция чемпионати. 5-тур

11 сентябрь (шанба)

КЛЕРМОН – ПСЖ

Ўйин бошланиш вақти: 20:00

ТВ-трансляция: МатчТВ Футбол.

Усмон Ибодов

Top