Gʻazoga oziq-ovqat yordami kamaydi, Tramp Ukraina rahbariyatini noshukurlikda aybladi – kun dayjesti

Bundan tashqari, Ukrainada Ilon Maskning «Starshield» harbiy sunʼiy yoʻldosh tarmogʻiga nisbatan cheklovlar boʻyicha xavotirlar ortmoqda. Biroq AQSH davlat kotibi Marko Rubio Kiyev bilan razvedka maʼlumotlarini ulashish toʻxtatilganini rad etdi. Prezident Donald Tramp esa «Starshield» boʻyicha hech qanday cheklov buyurmaganini bildirdi.

Vashington va Kiyev oʻrtasidagi munosabatlar shu kunlarda yanada taranglashdi. Dushanba kuni Tramp Ukraina rahbariyatini yana bir bor noshukurlikda ayblab, AQSH Ukrainaga koʻp narsa bergani, biroq evaziga hech narsa olmaganini eslatdi.

Shuningdek, u dizel kelishuvini tanqid qilgan Zelenskiyni keskin qoralab, uning oʻrniga boshqa odam kelishi kerakligiga ishora qildi: «Zelenskiy nima deyayotganini oʻzi ham bilmaydi. Ochigʻini aytganda, Ukraina nomidan muzokara olib borish uchun boshqa biror kishining vaqti keldi deb oʻylayman».

Fransiya shaharlarida komendantlik soati

Fransiyadagi namoyishlar jiddiy tartibsizliklarga aylanib ketgach, hukumat 19-oktabr kuni Parij, Lill va Nitsa kabi shaharlarning ayrim hududlarida komendantlik soati joriy etdi.

France 24'ga koʻra, cheklovlar shaharlarga qarab turlicha. Parijning ayrim hududlarida soat 23:00 dan ertalab 06:00 gacha komendantlik soati amal qildi, boshqa qismlarida esa 20:00 dan keyin namoyishlar taqiqlandi. Marselda esa barcha yigʻilish va namoyishlar taqiqlandi.

Yarim milliondan ortiq kishi qatnashgan namoyishlar va tartibsizliklar koʻlami katta boʻldi. Dam olish kunlari 2400 ga yaqin kishi hibsga olingan, qariyb 3000 ta doʻkon zarar koʻrgan.

Hukumat xavfsizlikdagi kamchiliklar uchun tanqid ostida qoldi. Prezident Emmanuel Makron ichki ishlar vaziri Loran Nunesning isteʼfo taklifini qabul qilmadi. Makron undan barrikadalar hamda talonchilikka barham berishni, razvedka va oldindan koʻra bilishdagi xatolar yuzasidan shaffoflikni taʼminlashni talab qildi. Nunes 60 ming nafar politsiya va boshqa xavfsizlik xodimi safarbar etilganini, biroq bu zoʻravon olomonni nazorat qilishga yetmaganini tan oldi.

Lekornyu tartibsizliklarning bir qismida prezidentlik saylovi arafasida mamlakatda chuqur notinchlik keltirib chiqarishga intilayotgan oʻta soʻl guruhlarni aybladi. Prezidentlikka nomzod soʻl siyosatchi Jan-Lyuk Melanshon esa bosh vazirdan dalil keltirishni, aks holda uzr soʻrashni talab qildi.

Namoyishlar ortida esa iqtisodiy norozilik yotibdi. Ular bir necha hafta davom etgan talabalar aksiyalaridan keyin avj olgan boʻlib, ishtirokchilar yashash va yoqilgʻi narxlarining oshishi hamda davlat xizmatlari sifatining yomonlashuvidan norozi. Namoyishchilar taʼlimga ajratiladigan mablagʻ boʻyicha oʻquvchilarning talablarini ham qoʻllab-quvvatlagan.

Makron esa yoqilgʻi narxini tushirish uchun qoʻshimcha benzin va dizel yetkazib berishni kafolatlash maqsadida Fors koʻrfazi mamlakatlariga safar uyushtirmoqda. U 19-oktabr kuni Kuvaytga yetib bordi.

Norozilik hali soʻnmagan. Ayrim joylar, jumladan, Parijda talabalar aksiya va blokadalarni davom ettirmoqda.

Husiylarning Yamanga hujumi: 58 kishi oʻldirildi

Husiylar Yaman janubidagi Shabva viloyatida hukumat kuchlarining oʻquv lageriga ballistik raketalar bilan zarba berdi. Rasmiylarning maʼlum qilishicha, hujumda kamida 58 kishi oʻldirilgan, 200 dan ortiq kishi yaralangan. Qurbonlarning aksariyati yangi chaqiriluvchilardir.

The Guardian'ning yozishicha, hujum 19-oktabr kuni Jardan tumanidagi al-Alam lageriga uyushtirildi. Lagerda yangi chaqiriluvchilar saf tortib turgan paytda uchta ballistik raketa tushgan. Yaradorlar viloyat markazi Ataqdagi kasalxonaga yetkazildi va aholidan qon topshirish soʻraldi.

Xalqaro miqyosda tan olingan Yaman hukumati hujumni falokat deb baholadi va zudlik bilan qattiq javob qaytarishga vaʼda berdi. Yaman Prezidentlik rahbariyat kengashi raisi Rashod al-Alimiy BMT bosh kotibi bilan telefon orqali gaplashib, husiylarni «xorijiy terroristik tashkilot» deb tan olishni soʻradi.

Husiylar esa hujumni boshqacha talqin qilmoqda. Guruhning harbiy matbuot kotibi ular saudiyalik ofitserlar boshqaradigan lagerdagi «Saudiya dushmani» kuchlarini nishonga olganini aytdi. Uning daʼvosiga koʻra, hujumda oʻnlab kishi, jumladan, saudiyalik ofitserlar ham oʻldirilgan va yaralangan. Yaman hukumati vakili esa bu daʼvoni rad etmoqda.

Yamanda soʻnggi bir oy davomidagi janglarda minglab kishi oʻldirilgani taxmin qilinmoqda.

AQShda Raul Kastroni hibsga olishga order

Florida shtati sudi 2021-yilgacha Kuba Kommunistik partiyasini boshqargan 95 yoshli Raul Kastroni hibsga olish uchun order berdi. Sudning fikricha, Kastro 1996-yilda birinchi darajali qotillik sodir etish maqsadida Kuba razvedkasi agentlari bilan til biriktirgan, deb hisoblashga yetarli asos bor.

Gap oʻsha yili Kuba qiruvchi samolyotlari Florida boʻgʻozi ustida ikkita fuqaroviy samolyotni urib tushirishi haqida bormoqda. Samolyotlar dengizda yordamga muhtoj kubalik qochqinlarni qidirayotgandi. Hodisada AQShning uch fuqarosi va bir nafar kubalik halok boʻlgandi.

Vashington oʻsha paytda Kuba qurolli kuchlari vaziri boʻlgan Kastroni hodisaga bevosita masʼul deb hisoblaydi. AQSH hukumati unga 2026-yil may oyida rasman ayblov eʼlon qilgandi. Aybi isbotlansa, Kastroga umrbod qamoq jazosi tahdid soladi.

Order AQShning Kubaga bosimi kuchaygan bir paytda berildi. AQSH prezidenti Donald Tramp oldinroq Kubani «muvaffaqiyatsiz davlat» deb atab, uni «doʻstona bosib olish» haqida ham gapirgandi.