Uy-joy mulkdorlarining majburiy badallari to‘g‘risida yangi hujjat muhokamaga qo‘yildi

Loyiha “Ko‘p kvartirali uylarni boshqarish to‘g‘risida”gi Qonunga va Prezidentning 2021 yil 19 iyundagi “Ko‘p kvartirali uy-joylarni boshqarish tizimini yanada takomillashtirish to‘g‘risida” PQ-5152-son qaroriga muvofiq ishlab chiqilgan.

Umumiy mol-mulkni saqlash bo‘yicha umumiy xarajatlar umumiy mol-mulkni saqlash, undan foydalanish va uni ta'mirlash, shuningdek ko‘p kvartirali uyga tutash yer uchastkasini obodonlashtirish bilan bog‘liq xarajatlardan iboratdir.

Joy mulkdorlarining umumiy mol-mulkni saqlash bo‘yicha umumiy xarajatlarda ishtirok etish ulushi ko‘p kvartirali uyning umumiy maydonidagi mulkdorga qarashli joy maydoni ulushiga mutanosib ravishda ko‘p kvartirali uyning kadastr pasportiga muvofiq belgilanadi.

KKUdagi joy mulkdorlarining majburiy badallarini quyidagilarga sarflash rejalashtirilmoqda:

• umumiy mol-mulkka xizmat ko‘rsatish, ularni ta'mirlash va saqlashga;
• boshqaruvga (ma'muriy xarajatlar);
• yer uchastkalarini obodonlashtirish, ularni saqlash va boshqarishga.

O‘z navbatida, masalan, umumiy mol-mulkka xizmat ko‘rsatish, ularni ta'mirlash va saqlash quyidagi ishlarni o‘z ichiga oladi:

• uy tomining gidroizolyatsiya qatlamini tiklash, hozirgi holatda talab qiladigan joylarni almashtirish, tomni to‘liq almashtirish;
• uyning fasad qismini rekonstruksiya qilish yoki uni almashtirish;
• lift uskunalarini ta'mirlash va boshqalar.

Joy mulkdorlarining majburiy badallari miqdori mulkdorlarning umumiy yig‘ilishi qarori bilan belgilanadi.

Loyiha o‘zgartirilishi, unga qo‘shimcha kiritilishi yoki rad etilishi mumkin.