Toshkentda ikki mansabdor majburiy badal tushumlarini o‘zlashtirib yuborgani ma’lum bo‘ldi

Toshkentda ikkita ko‘p qavatli uylarni boshqaruvchi tashkilot rahbari qo‘lga olingan. Bu haqda Qurilish va uy-joy kommunal xo‘jaligi vazirligi xabar berdi.  

Ma’lum qilinishicha, poytaxtning Uchtepa tumanida faoliyat yuritgan boshqaruv tashkiloti rahbari O.O. 247 mln so‘m aholi mablag‘larini bank hisobraqami orqali kirim qilmasdan, noqonuniy o‘zlashtirib yuborgan. Shuningdek, Yangihayot tumanida faoliyat yuritgan boshqaruv tashkilotlaridan birining rahbari A.K. 2021-2022 yillar davomida majburiy badal to‘lovini amalga oshirish uchun aholidan undirilgan 154 mln so‘m mablag‘larni bank hisobiga kirim qilmay, o‘z ehtiyojiga ishlatib yuborgani aniqlangan.  

Mazkur holatlar yuzasidan gumonlanuvchilarga nisbatan “qamoq” ehtiyot chorasi qo‘llangan.  

“Mazkur jinoiy xatti-harakatlar sohada nazorat tizimini yanada kuchaytirish zaruratini tug‘dirmoqda. Shu ma’noda joylarda Qurilish va uy-joy kommunal xo‘jaligi vazirligi tomonidan ishchi guruhlar tuzilib, boshqaruv tashkilotlarining faoliyatini o‘rganish ishlari amalga oshirilmoqda”, deyiladi vazirlik xabarida.