Inson huquqlari bo‘yicha Yevropa sudi Rossiya hukumatiga huquq himoyachisi Valentina Chupikni O‘zbekistonga deportatsiya qilishni taqiqladi. Bu haqda advokat Darya Trenina o‘z Facebook sahifasida ma'lum qildi.
Qayd etilishicha, sud 39-qoidani qo‘llagan. Aksariyat hollarda 39-qoida ekstraditsiya yoki mamlakatdan chiqarib yuborishni to‘xtatish uchun qo‘llanadi.
Chupik 17 sentyabrda Rossiyada qochqin maqomidan mahrum qilingan.
U 25 sentyabr kuni Moskvaning Sheremetevo aeroportida ushlangandi.
Shuningdek, unga 2051 yilgacha Rossiyaga kirish taqiqlangan.
Valentina Chupik migrantlarga yordam berish bilan shug‘ullanuvchi Tong Jahoni notijorat tashkiloti rahbari hisoblanadi.
U O‘zbekistonni 2006 yilda tark etgan.
