O‘zsanoatqurilishbankda transformatsiya: Buxoroda mijozlarga xizmat ko‘rsatishning yangi tizimi ishga tushirildi

Ilgari har bir filial o‘ziga tegishli Bank xizmatlari markazlari va chakana kassalari tarmog‘ini boshqargan bo‘lsa, hozirda barcha tarmoqlar boshqaruvi mintaqaviy filial zimmasiga o‘tkazilib, quyi filiallar faqat mijozlar bilan ishlashga biriktirildi.

Bank mahsulotlarini sotish bilan bog‘liq bo‘lgan barcha vazifalar markazlashtirildi.

– Filialda xizmat ko‘rsatish sifatini oshirishda, ayniqsa, biznes natijalariga asoslangan kaskadli rag‘batlantirish tizimining joriy etilganligi ko‘proq samara bermoqda, – deydi Bank mahsulotlarini sotish va tarmoqlarni muvofiqlashtirish departamenti direktori Bahodir Nizomov. – Bu borada front-ofisdagi har bir xodim uchun uning vazifalari bilan bog‘liq holda rag‘batlantirishning yangi tizimi ishlab chiqildi. Avval butun filial uchun reja tuzilgan bo‘lsa, hozir har bir xodim o‘z shaxsiy rejasiga ega. Shu asosda har chorak yakuniga ko‘ra, sotuv va xizmat ko‘rsatish bo‘yicha yuqori natijaga erishgan xodimlar alohida rag‘batlantirilmoqda.

Shuningdek, filialda mijozlarga mijozbay xizmat ko‘rsatish tizimi joriy etildi. Bu bilan mijozlarga individual xizmat ko‘rsatuvchi menejyerlar doirasi shakllantirildi. Xususan, chakana biznes blokiga 3 nafar, potensial mijozlar uchun 7 nafar, yuridik shaxslar uchun 3 nafar, korporativ mijozlarga 1 nafar menejyer tayinlandi. 9 nafar biznes menejyeri va yana shuncha universal servis menejyeri, 5 nafar ofis va 12 nafar xizmat menejyeri ishga jalb qilindi.

Transformatsiyadan oldin xodimlar tomonidan tor yo‘nalishli mutaxassis sifatida “bir xodim – bitta mahsulot” tamoyiliga muvofiq, xususan, kassaning har bir oynasida bitta operatsiya bo‘yicha (valuta ayirboshlash, pul o‘tkazmalarini qabul qilish, kommunal to‘lovlar) xizmat ko‘rsatilgan. Bu holat mijozlarga qator noqulayliklar tug‘dirgani ham bugun hech kimga sir emas.

Transformatsiyadan so‘ng, kassalar faoliyati universallashtirildi. Naqd pulli operatsiyalarni navbatlarsiz qabul qilish maqsadida chakana biznes mijozlari uchun pul o‘tkazmalari, omonatlarni rasmiylashtirish, barcha turdagi kartalar va SVIFT operatsiyalari uchun «yashil yo‘lak» tashkil etildi.

Xodimlarning asosiy faoliyati sotuvga yo‘naltirganligi natijasida xizmat ko‘rsatish tezligi 1,5 baravarga oshirildi.  

Yuridik shaxslar uchun valuta bilan ishlash, hisob raqam ochish, kredit, operatsion xizmatlar va to‘lovlar bo‘yicha toifalangan xodimlar jamoasi yangi tizimga ko‘ra, biznes menejyerlar jamoasiga almashtirildi.

Bankda o‘qishdan oldin test o‘tkazish tizimi bo‘yicha joriy qilingan o‘rtacha bilim darajasi 41 foizdan 73 foizgacha oshirildi.

IT dasturlar zamonaviy modelga moslashtirildi va modernizatsiya qilindi.

– Bugungi kunda mijozlarimiz bazasi va mijozlar bilan munosabatlarimiz raqobatbardoshligimizni ta'minlovchi asosiy ustunligimiz hisoblanadi, – deydi Boshqaruv raisi o‘rinbosari Shohpur Gulto‘rayev. – Buni yanada rivojlantirib borish maqsadidamiz. Buning uchun mijozlarning haqiqiy ehtiyojlarini aniqlab, yangi mahsulot va xizmatlarni ishlab chiqishga, bu borada har bir mijoz talab va xohishlariga individual yondashishga harakat qilayapmiz.

Muxtasar qilib aytganda, transformatsiya jarayonlarining yakuniy bosqichi amalga oshirilayotgan O‘zsanoatqurilishbank filiallari tarmog‘i butunlay isloh etilmoqda.

Eng muhimi, davlatimiz rahbarining yuqoridagi farmonida qayd etilganidek, bank tizimini isloh qilish davrida aholining moliyaviy xizmatlarga bo‘lgan talabini qondirish, yirik korxonalar va tadbirkorlik sub'yektlarining investitsiya loyihalarini qo‘llab-quvvatlashda keng miqyosli  mexanizm yaratish hamda bank xizmatlarining hududiy qamrovini ta'minlashga munosib hissa qo‘shilmoqda.

O‘zsanoatqurilishbank axborot xizmati Ⓣ