Sinov Arizona shtatidagi Yuma poligonida oʻtkazilgan. Unda Dengiz piyodalari korpusining 1-operativ sinov va baholash eskadrilyasi uchuvchilari qatnashgan.
Bu yerda gap sakkizta bombani aynan bir lahzada emas, balki nishonga bir marta yaqinlashish davomida ketma-ket tashlash haqida bormoqda. Shu tariqa samolyot har bir bomba uchun nishonga qayta parvoz qilishiga hojat qolmaydi.
StormBreaker nomi bilan ham tanilgan SDB II - ogʻirligi taxminan 113 kilogramm boʻlgan kichik oʻlchamli, yuqori aniqlikdagi boshqariladigan aviabomba. Materialda keltirilishicha, u turli ob-havo sharoitlarida kamida 70 kilometr masofadagi harakatlanuvchi nishonlarni urishga moʻljallangan.
StormBreaker’ni F-35 qurollanishiga integratsiya qilish dasturiy taʼminot muammolari va boshqa qiyinchiliklar sabab kechikkan. Biroq bittada bir nechta bombani qoʻllash imkoniyati samolyotning jangovar vazifalarni bajarish usulini oʻzgartirishi mumkin.
AQSH Harbiy-havo kuchlarining isteʼfodagi general-mayori Jon Norman Air & Space Forces nashriga bergan izohida bu usul uchuvchining nishonga qayta-qayta yaqinlashishi zaruratini kamaytirishini aytgan. Uning fikricha, bu qoʻshimcha parvozlar bilan bogʻliq xavfni qisqartiradi va har bir oʻq-dori uchun qoʻllash parametrlarini qoʻlda hisoblash yukini yengillashtiradi.
StormBreaker’ning tarmoq orqali maʼlumot almashish imkoniyatlari nishonlarni urish hududini oldindan belgilangan maydon bilan cheklashga ham imkon beradi. Materialda bu xususiyat bombaning avvalgi avlod kassetali oʻq-dorilariga nisbatan afzalliklaridan biri sifatida keltirilgan.
Hozirgi sinov F-35B modifikatsiyasida oʻtkazilgan. Uning natijalari bu imkoniyat barcha F-35 samolyotlarida allaqachon joriy etilganini anglatmaydi.
