Qashqadaryoda 9 yil oldin sodir etilgan qotillik fosh qilindi

Bosh prokuratura Qashqadaryo viloyatida 9 yil muqaddam sodir etilgan qotillik fosh qilingani haqida xabar berdi. Ma'lum qilinishicha, 2012 yil 24 yanvar kuni Qashqadaryo viloyati, Koson tumani Qorabo‘yin mahallasida yashovchi T.G‘. o‘ziga tegishli Nexia 2 mashinasida uyidan chiqib ketib, bedarak yo‘qolgan.

Oradan biroz o‘tib T.G‘. boshqaruvida bo‘lgan Nexia 2 mashinasi Samarqand shahar Madaniyat mahallasida joylashgan ko‘p qavatli uyning orqa tomonidan topilgan. Holat yuzasidan Qarshi tuman prokuraturasi tomonidan Jinoyat kodeksining 97-moddasi 1-qismi bilan jinoyat ishi qo‘zg‘atilgan.

Bedarak yo‘qolgan G‘.T.ga tegishli Nexia 2 mashinasini ko‘zdan kechirish davomida, uning turli joylaridan jami 14 dona barmoq va kaft izlari olingan.

Qayd etilishicha, mazkur jinoyat ishi yuzasidan Qashqadaryo viloyat prokuraturasi tomonidan viloyat IIB bilan hamkorlikda amalga oshirilgan keng qamrovli tadbirlar natijasida yaqinda jinoyat fosh etilgan.

«Tergovda aniqlanishicha, M.O., T.A. va D.S. tomonidan bedarak yo‘qolgan G‘.T. qasddan o‘ldirilib, uning jasadi Chiroqchi tumani, Sho‘rbozor mahallasi hududida joylashgan zaxiradagi dala maydonida ko‘mib yuborilgan. Nexia 2 mashinasi esa Samarqand shahar Madaniyat mahallasidagi ko‘p qavatli uyning orqa tomoniga tashlab ketilgan.

Ushbu uch shaxs sodir etgan jinoyati ularning iqrorlik ko‘rsatuvlari, jinoyat sodir etilgan joyda aniqlangan barmoq izlari, ko‘rsatmalarni hodisa sodir bo‘lgan joyda tekshirish va yuzlashtirish tergov harakatlari hamda boshqa dalillar majmui bilan to‘liq o‘z isbotini topgan», deyiladi Bosh prokuratura matbuot xizmati xabarida.

Ushbu jinoyat ishi yuzasidan 3 nafar shaxsga Jinoyat kodeksining 97-moddasi bilan ayb e'lon qilinib, barchasiga qamoqqa olish ehtiyot chorasi qo‘llangan. Hozirda jinoyat ishi yuzasidan Qashqadaryo viloyat prokuraturasi tomonidan tergov harakatlari olib borilmoqda.

Bundan oldinroq, 2020 yilda Buxoroda 32 yil avval, 1988 yilda sodir etilgan va ochilmasdan qolib ketgan qotillik jinoyati fosh qilingandi.