Osloda tinchlik boʻyicha Nobel mukofoti laureati eʼlon qilindi. Bu yil Navanethem (Navi) Pilley «tinchlik va xalqaro huquqni targʻib qilishdagi saʼy-harakatlari uchun» mukofotlandi.

Pilley xonim muqaddam BMTning Ruanda boʻyicha Xalqaro jinoiy tribunalida ishtirok etgan, jumladan tribunal raisi boʻlgan. 2003-yildan 2008-yilgacha Xalqaro jinoyat sudi (XJS) sudyasi sifatida faoliyat koʻrsatgan. 2008–2014-yillarda esa BMTning Inson huquqlari boʻyicha oliy komissari edi.

Joriy yilda diplomatiya va gumanitar faoliyat sohasidagi eng nufuzli mazkur mukofotga yuzlab kishilar tavsiya etilgandi.

Nomzodlar roʻyxati 50 yil davomida sir saqlanadi, shuning uchun jamoatchilik unda Donald Trampning nomi bor-yoʻqligini hali uzoq vaqtgacha bila olmaydi: u bir necha yildan beri oʻziga shunday mukofot berilishini soʻrab kelmoqda.

AQSH prezidenti «sakkizta urushga chek qoʻygani»ni va mukofotga eng loyiq odam ekanini taʼkidlaydi.

«Ular mendaylarga mukofot bermaydigan odamlar. Va menimcha, bu ularni obroʻsizlantiradi. Men buni nafrat yuzasidan aytayotganim yoʻq», – dedi Tramp shu kunlarda ham bu masalaga toʻxtalib.

Manbalarga koʻra, Oslodagilar Eronga qarshi boshlangan urush, hududiy daʼvolar, xususan, Grenlandiyaga boʻlgan daʼvolar, muhojirlarga nisbatan qatʼiy siyosat, shuningdek, xalqaro hamkorlik va ommaviy axborot vositalariga hujumlari tufayli Amerika prezidentini munosib nomzod deb hisoblamaydi.

Shu bilan birga, Tramp Nobel qoʻmitasining oltin medaliga ega. 2025-yilda tinchlik boʻyicha Nobel mukofotini olgan venesuelalik muxolifatchi Mariya Korino Machado oʻz medalini unga berib yuborgandi.

U Venesuela prezidenti Nikolas Maduro Amerika kuchlari tomonidan qoʻlga olinganidan soʻng Trampni mukofotga loyiq deb topgandi. Biroq buning evaziga u Oq uyning siyosiy qoʻllab-quvvatloviga erisha olmadi.

Har bir Nobel mukofoti diplom, oltin medal va 1,2 million dollar miqdoridagi pul mukofotini oʻz ichiga oladi.