Tomda joylashgan book-cafe’lar va muloqot maydonchalari: Yangicha kutubxonalar quriladi

Tumanlarda eski tartibdan chiqib, umuman yangi ko‘rinishdagi kutubxonalar tashkil etish maqsad qilinadi, bu boradagi loyiha ekspertizadan o‘tkazilmoqda. Bu haqda Kun.uz bilan suhbatda AOKA axborot-kutubxona tizimini rivojlantirish bo‘lim boshlig‘i Qobiljon Tursunov ma'lum qildi.

«Yangicha kutubxonalar, nafaqat kitob olib o‘qishga, balki yoshlarning muloqot maydonchasiga aylanishi kerak. Yoshlar bu yerda faqat kitob o‘qibgina qolmay, o‘zlarini qiziqtirgan narsalar yuzasidan muloqot qilishi mumkin bo‘ladi. Bu yerda co-working markazlarining tashkil etilishi ham yoshlarni ko‘proq jalb etish masalasiga qaratilgan. Bosma nashrdan tinch kitob o‘qib o‘tirish imkoniyati, yoki tom qismlarida book-cafe’lar tashkil qilib, bir piyola choy ustida muhokamalar qilish imkoniyatini yaratish uchun shunday loyiha qildik.

Loyihamiz oxiriga yetay deb qoldi va uni ekspertizadan o‘tkazyapmiz. Yangi ko‘rinishdagi kutubxonalarni tumanlarda qurish masalasida taklifimizni hukumatga kiritdik. Tumanlarda 2026 yilgacha bosqichma-bosqich qurib borish, moliyalashtirish masalalarini ko‘tardik. Tuman kutubxonalarida ham Alisher Navoiy kutubxonasidagi sharoitlarni yaratishimiz kerak», — deydi u.

Avvalroq, Kun.uz yoppasiga yopilgan kutubxonalar va ularning yopilish sabablari borasida ko‘rsatuv e'lon qilgandi.