APLda «Chelsi» - «MYu», La Ligada peshqadamlar to‘qnashuvi, A Seriyada grandlar «jangi». Hafta o‘yinlari anonsi

Italiyada «Napoli» va «Milan»ning peshqadamligi vaqtinchalikmidi? «Vest Hem»ning yurishi to‘xtadimi? «Yunayted»ning muammolari faqat Sulsherga bog‘liqmi? Ispaniyada eng yaxshi jamoa qaysi? «Barselona» qachon gol uradi? Bu haftani qaysidir ma'noda javoblar haftasi deb atash mumkin. Avvalgi turlardan yig‘ilib qolgan savollar va avvalroq sodir bo‘lgan natijalarning qay darajada asosli bo‘lganini aynan mana shu dam olish kunlaridagi o‘yinlar ochiqlab beradi.

A Seriya. 14-tur

27 noyabr (shanba)

YuVeNTUS – ATALANTA

O‘yin boshlanish vaqti: 22:00

TV-translatsiya: Sport

O‘tgan turda ham «Napoli», ham «Milan»ning mag‘lubiyati ligada intrigani oshirib yubordi va ta'qibchilarga umid berdi. «Yuventus»ni hali chempionlar poygasidan uzoq deb hisoblasak-da, jamoa salohiyati A Seriyada uzoq g‘alabali seriyani amalga oshirishga yetadi. Bunday seriya esa har qanday jamoani peshqadamlar qatoriga qo‘sha oladi.

Har ikki jamoa Chempionlar Ligasining navbatdagi turida omadsiz natija qayd etgani ham bu o‘yinning darajasini oshiradi. «Yuventus» muddatidan avval pley-offga chiqqan bo‘lsa-da, Londondagi yirik mag‘lubiyat og‘ir bo‘ldi va endi turinliklar guruhda 1-o‘rinni ololmay qolishlari mumkin. «Atalanta» esa «Yang Boyz» bilan durang o‘ynab qo‘ydi va endi keyingi bosqich uchun so‘nggi turda «Vilyarreal»ni yengishlari shart.

«Yuventus» bu o‘yinda g‘alaba qozonsa, «Atalanta»ga, ya'ni kuchli to‘rtlikka 1 ochko masofada yaqinlashadi. «Atalanta» esa A Seriyadagi mag‘lubiyatsiz seriyasini 7 o‘yingacha oshirishi va peshqadamlarni ta'qib etishda davom etishdan umidvor. Bergamoliklar keyingi safar o‘yinlarini «Napoli» va «Verona»ga qarshi o‘tkazishlarini e'tiborga olsak, imkon qadar mag‘lubiyatga uchramasligi kerak. «Yuventus» bu tomondan juda yaxshi holatda, agar Allegri shogirdlari bugun g‘alaba qozonishsa, keyingi 5 tur juda oson raqiblar bilan o‘tadi – «Salernitana», «Venetsiya», «Bolonya», «Kalyari» va «Jyenoa». Demak, «Yuventus» yetakchilarga yaqinlashib olishi uchun qulay davr boshlanmoqda.

«Atalanta» anchadan buyon Italiyada jiddiy kuchga aylangan bo‘lsa-da, aynan «Yuventus» bilan o‘yinlarda u qadar ishonchli emasligini ta'kidlash kerak. Oxirgi o‘n yilda A Seriya doirasidagi faqat bir marotaba o‘z maydonida g‘alaba qozongan xolos. Turindagi o‘yinlarda esa vaziyat yanada og‘ir, bir necha duranglar qayd etilgan bo‘lsa-da, mehmonlarning oxirgi g‘alabasi 1989 yilga to‘g‘ri keladi.

La Liga. 15-tur

27 noyabr (shanba)

VILYaRReAL – BARSeLONA

O‘yin boshlanish vaqti: 01:00

TV-translatsiya: FutbolTV

Xavi uzoq kutilgan va «Barselona» o‘yini qisman yaxshilana boshlagani ko‘rinayotgan bo‘lsa-da, hozircha, ayniqsa oldingi chiziqda muammolar yechilmadi. Jamoa yangi murabbiy qo‘l ostida ikki o‘yinda maydonga tushdi va faqat bir marta penaltidan gol urdi. Vaziyatlar yetarlicha bo‘lmoqda, ammo hujumchilarning yosh va tajribasiz ekani ko‘pincha pand berib qo‘yayotgandek.

«Vilyarreal» esa La Ligada eng yaxshi himoyaga ega bo‘lgan jamoalardan biri bo‘lib, gol o‘tkazish bo‘yicha 4-o‘rinda turibdi. Lekin boshqacha statistika ham bor – «Vilyarreal» oxirgi marta «Barselona» ustidan g‘alaba qozonganda kataloniyaliklar tarkibida Ronaldino, «sariqlar» libosida esa Rober Pires va Markus Senna to‘p surardi. 2008 yildan buyon o‘tgan 26 uchrashuvda «Vilyarreal» biror marta ham «Barselona»ni yuta olmay kelyapti. Bu jamoalar o‘rtasidagi o‘yin haqida gap ketsa, beixtiyor ikki yil oldingi 4:4 esga keladi. O‘shanda «Barselona» o‘yin boshida 2 gol urgan, so‘ng mezbonlar qatorasiga 4 gol urib, g‘alabani naqd qilgan paytda, qo‘shib berilgan daqiqalarda Messi va Suares o‘yinni qutqarib qolishgandi.

Jamoalar tarkibiga kelsak, «Vilyarreal»ning yetakchi to‘purari Jyerar Moreno hali tiklanib ulgurgani yo‘q va uning yo‘qligi jamoa natijalariga jiddiy ta'sir ko‘rsatmoqda. Yuqorida himoyadagi ishonchli ko‘rsatkichlar haqida so‘z bordi, ammo hujumda ishlar yomon – 13 o‘yinda atigi 15 gol. O‘tgan yilgi shu davrga nisbatan qariyb 2 barobar kam. O‘tgan yilgi shu paytda Morenoning o‘zida 12 gol bor edi. «Barselona» tarkibida Pedri, Roberto, Fati va Breytgueytlar davolanishda davom etishmoqda, lekin Usmon Dembelening tiklangani yaxshi xabar, zero fransiyalik hujumchi «Benfika»ga qarshi o‘yinda ham o‘ziga berilgan daqiqalarda juda ishonchli harakat qildi va bir qator xavfli vaziyatlar yuzaga keltira olgandi.

APL. 13-tur

28 noyabr (yakshanba)

MANCheSTeR SITI – VeST HEM

O‘yin boshlanish vaqti: 19:00

TV-translatsiya: FutbolTV/UzReport

Gvardiola Angliyaga kelganidan buyon biror marta ham «Vest Hem»ga mag‘lubiyatga uchramagan. Atigi ikki marta durang qayd etilgan. Ammo mana shu duranglarda ham qaysidir ma'noda mag‘lubiyat bor – jamoalar yaqinda Liga Kubogi doirasida o‘zaro bahslashishdi va hisob ochilmagach, «Vest Hem» penaltilar seriyasida g‘alaba qozondi. «Manchester Siti» qatorasiga 4 yildan beri yutib kelayotgan turnirdan chiqib ketishga majbur bo‘ldi.

Undan tashqari, jamoalar turnir jadvalida deyarli qo‘shni, masalan «Vest Hem» g‘alaba qozonadigan bo‘lsa, ochkolar soni bo‘yicha yetib ham oladi. 14-turga kelib shunday fikr aytilayotganining o‘zi «Vest Hem» qay darajada yuqori o‘yin ko‘rsatayotganini bildiradi. «Liverpul»ning mavsumdagi hozircha yagona mag‘lubiyati sababchisi bo‘lgan Moyyes shogirdlari «Etihad»da ham osonlikcha taslim bo‘lmasliklari taxmin qilsak bo‘ladi.

Har ikki jamoa ham hafta o‘rtasida yevrokubokda maydonga tushdi va g‘alaba qozondi. «Manchester Siti» bir kun oldin o‘z maydonida to‘p surdi, «Vest Hem» esa Venaga safar qilgan bo‘lsa-da, asosiy tarkibning asosiy qismi dam oldi. Ya'ni sport formasi nuqtai nazaridan har ikki jamoada ham u qadar muammo bo‘lmasligi lozim.

Faqat «Manchester Siti» oldingi chizig‘ida jarohatlanganlar ko‘p. Torres, Grilishga qo‘shilib, Foden ham bu o‘yindan chetda qolishi mumkin. Kevin De Bryuyne esa virus yuqtirib oldi va u ham yaqin o‘yinlarda sheriklariga yordam bera olmaydi. Mehmonlar tarkibida esa Anjyelo Ogbonna «Liverpul»ga qarshi og‘ir jarohat olgan va u katta ehtimol ushbu mavsumda maydonga tusha olmaydi.

APL. 13-tur

28 noyabr (yakshanba)

CheLSI – MANCheSTeR YuNAYTeD

O‘yin boshlanish vaqti: 21:30

TV-translatsiya: FutbolTV/UzReport

Mavsum boshida bu ikki jamoa chempionlikka da'vogar bo‘lgan ikki teng kuchli raqobatchi sifatida tilga olinayotgan bo‘lsa, hozir farq – yer bilan osmon. «Chelsi» nafaqat Angliyada, balki Yevropada eng yaxshi o‘yin namoyish etmoqda, Manchester Yunayted» esa bir qator katta transferlardan keyin hatto o‘tgan yilgi o‘yinini ham ko‘rsata olmayapti va Sulsherni iste'foga chiqardi.

APLda birinchi marta va katta ehtimol bilan oxirgi marta Maykl Karrik jamoani maydonga olib tushadi. «Vilyarreal»ga qarshi o‘yinda jamoa g‘alaba qozongan bo‘lsa-da, muammolar yo‘qolgani yo‘q, buning ustiga tarkibda ham yetishmovchiliklar bor. Odatda «Yunayted» top-o‘yinlarda 5 himoyachi bilan o‘ynab, son jihatidan qarshilik ko‘rsatishga urinib ko‘rardi, lekin hozirda Varan jarohatda, Maguayr esa «Uotford»ga qarshi o‘yinda maydondan chetlatilgandi. Tarkibda uch markaziy himoyachi sxemasi uchun son jihatidan ham yetarli kadr yo‘q. Balki Shou yoki Matich bilan uchinchi markaziy himoyachi o‘rni to‘ldirilishi mumkin. Shuningdek, Maktominey ham Shotlandiya milliy jamoasida shu pozitsiyada to‘p surishini eslash mumkin. Yana, Kavani, Shou va Fredning Londonda maydonga tushishi so‘roq ostida, Pogba hali tiklanmadi, Grinvud esa virus yuqtirib olgan.

«Chelsi»da ham tarkibda muammolar yetarli. Lukaku tiklanayotgani aytilsa-da, hali maydonga tushgani yo‘q. Kovachich jarohatlangan. Bu o‘yin oldidan esa Ben Chilluell va Ngolo Kantelarning ham safdan chiqqani ma'lum bo‘ldi. Kantening jarohati jiddiy bo‘lmasa, Chilluell hatto to‘rt oygacha maydondan chetda qolishi mumkin. Aynan qanot o‘yinchilari rotatsiyasi bilan raqiblarni chalg‘itayotgan Tuxel uchun bu katta yo‘qotish bo‘lishi mumkin. Shuningdek, Haversning tayyorligi shubha ostida qolgandi, ammo murabbiy uning «MYu» bilan o‘yinda maydonga tusha olishini ma'lum qildi.

Jamoalar o‘rtasidagi o‘tgan mavsumdagi har ikki uchrashuv ham 0:0 hisobida yakunlangan. Umuman oxirgi 10 yilda har tomonlama tenglik: 11 tadan g‘alaba va 10 uchrashuv durang bilan tugagan.

A Seriya. 14-tur

28 noyabr (yakshanba)

NAPOLI – LATsIO

O‘yin boshlanish vaqti: 00:45

TV-translatsiya: Sport

«Napoli»ning g‘alabasiz o‘yinlari 3taga yetdi. Yevropa Ligasidagi mag‘lubiyatni tushunsa bo‘ladi, jamoa agar bahorda ham chempionlikka da'vogarlik qiladigan bo‘lsa, bunday musobaqa faqat xalaqit beradi. Ammo «Verona» bilan durang hamda «Inter»dan mag‘lubiyat futbolchilarning o‘ziga bo‘lgan ishonchiga qattiq zarba bo‘lishi mumkin. Yaxshiyamki, «Milan» ham bu turlarda ochko yo‘qotdi va neapolliklar peshqadamlikni saqlab qolishdi. Ammo yana bir yo‘qotish nafaqat «Milan» bilan raqobatda pand berishi, balki pastdan quvlab kelayotgan «Inter» va «Atalanta»ni yaqinlashtirib qo‘yishi mumkin. «Napoli» keyingi turda «Sassuolo» bilan, dekabrda yana «Atalanta» va «Milan»ga qarshi, yanvarning boshida esa «Yuventus» bilan o‘ynaydi. Og‘ir sinov davri davom etmoqda.

«Latsio» ham kuchli to‘rtlik uchun da'vogarlardan biri va tabiiyki, ochko zarur. «Yuventus»dan mag‘lubiyatdan so‘ng, jamoada o‘rtamiyonalar orasiga tushib qolish xavfi paydo bo‘ldi. Yevropa Ligasida «Lokomotiv» ustidan g‘alaba va Chiro Immobilening safga qaytishi rimliklarga ijobiy ruhiyat taqdim etishi mumkin.

«Napoli» yuqorida tilga olingan og‘ir taqvim davrida tarkibda muammolarga duch kelganini ham ta'kidlash kerak. Yetakchi hujumchi Viktor Osimxen «Inter» bilan o‘yinda og‘ir jarohat oldi va fevralgacha yordam bera olmasligi aniq. Politano koviddan davolandi va hali ham safga qaytgani yo‘q. Zambo-Angissa mushaklaridan jarohat oldi va kamida bir hafta maydonga tusha olmasa kerak. Mehmonlar tarkibida esa Adam Marushichda kichik jarohat bor.

O‘tgan mavsumda «Napoli» o‘zi mezbonlik qilgan o‘yinda 5:2 hisobida chiroyli g‘alabaga erishgandi. Umuman uch yildan beri bu jamoalarning o‘zaro o‘yinlarida faqat mezbon jamoaning g‘alabasi qayd etilyapti.

La Liga. 15-tur

28 noyabr (yakshanba)

ReAL – SeVILYa

O‘yin boshlanish vaqti: 01:00

TV-translatsiya: FutbolTV/UzReport

Agar Ispaniya chempionati turnir jadvalini aynan yo‘qotilgan ochkolar bo‘yicha tuzsak, ya'ni o‘yinlar sonini ham inobatga olsak, aynan mana shu ikki jamoa birinchi va ikkinchi o‘rinlarni egallab turibdi. Oradagi farq ham ikki ochko. Ya'ni bu o‘yin natijasi La Ligadagi haqiqiy peshqadamni o‘zgartirishi mumkin. Bir paytlar «Real»dan iste'foga chiqarilgan Xuan Lopategi albatta, chempionlik raqobatida sobiq jamoasini yengishni ko‘proq istasa kerak.

Nafaqat bugungi kundagi ochkolar, balki ko‘p statistik ko‘rsatkichlar bo‘yicha ham bu ikki jamoa Ispaniyada yetakchilarga xos o‘yin namoyish etishmoqda. Darvozaga berilgan zarbalar, xavfli vaziyatlar bo‘yicha bu ikki jamoa peshqadam, himoya borasida esa «Sevilya» ligada eng kam – atigi 9 marta gol o‘tkazib yuborgan xolos. Yulduzlarning o‘yinga ta'siri bo‘yicha Yevropada eng yaxshilardan biri bo‘lmish «Real» va raqib ustunliklarini yo‘qqa chiqargan holda natija qayd etish bo‘yicha yuqori darajali jamoa «Sevilya» o‘rtasidagi kurash, albatta, neytral tomoshabinlar uchun ham juda qiziq bo‘lsa kerak.

Tarkiblarga kelsak, «Real»da ikki asosiy markaziy himoyachi – Militao va Alaba safdan chiqqan. Militao bir necha haftaga yo‘qotilgan bo‘lsa, Alaba noma'lum, balki shu o‘yinda ham tayyor bo‘lish ehtimoli bor. «Sevilya»da esa yetakchi himoyachi Diyego Karlos sheriklariga yordam bera olmasligi mumkin. Shuningdek, Xesus Navas ham mushaklaridan jarohat olib, kamida yana bir hafta maydonga qayta olmasa kerak. Navas ushbu mavsumda sheriklari uchun qulay vaziyat (7ta) yaratish bo‘yicha La Ligada eng yaxshi ko‘rsatkichga ega. Uning yo‘qligi mehmonlarning hujumdagi salohiyatiga jiddiy ta'sir qilishi turgan gap.

BOShQA O‘YINLAR

28 noyabr. ARSeNAL – Nyukasl (17:30), Volfsburg – BORUSSIYa D (19:30), LIVeRPUL – Sauthempton (20:00), BAVARIYa – Arminiya (22:30), Venetsiya – INTeR (28 noyabrga o‘tar kechasi, 00:45).

29 noyabr. Sent Eten – PSJ (17:00), Byornli – TOTTeNHEM (19:00), MILAN – Sassuolo (19:00), ROMA – Torino (22:00), LeYPsIG – Bayyer (21:30), Kadis – ATLeTIKO (22:30).