Qo‘llarimda nuqson borligi hayot to‘xtadi degani emas

{Yii::t(}

O'tkazib yuborish 6s

O'tkazib yuborish

Zarina Andijon davlat universitetining 4-bosqich talabasi. U nafaqat o‘qishda, balki uy-ro‘zg‘or ishlarida ham faol. Boshqalarga qaram bo‘lishni xohlamaydi va doimiy izlanishdan to‘xtamaydi.

Kun.uz muxbiri cheklangan imkoniyatiga qaramasdan tinim bilmay hayotda o‘z o‘rnini topish uchun harakat qilayotgan Zarina bilan suhbatlashdi.

“Yoshligimda ko‘chaga chiqsam, maktabga ketayotsam meni bir marta ko‘rgan odam “Xudo o‘zingga shukr, tavba qildim”, deyishardi. Men o‘shanda yig‘lardim. Shunchalik qo‘rqinchlimanmi, deb xafa bo‘lardim. Keyin o‘ylasam, ahmoq bo‘lgan ekanman. Ming shukr qilishni boshladim. Ko‘nglim og‘rigan paytlarda ko‘proq kim bilandir gaplashgim keladi”, – deydi Zarina.

Zarina o‘quv markazida ingliz tilidan dars berib kelmoqda. O‘qituvchilik uning eng sevimli kasbi. Hozirda 60 dan ortiq shogirdlari bor.

Shuningdek, qahramonimiz sportning tayekwando turi bilan ham shug‘ullanadi. O‘zbekiston chempionatida bronza medalini qo‘lga kiritgan. Kelgusida esa Paralimpiya yo‘llanmasini qo‘lga kiritib, chempion bo‘lishni maqsad qilgan.

Uning qo‘llarida nuqsoni bo‘lsa-da, oyoqlarida barcha kuchlari mujassamlashgan. Bu haqda tayekwando bo‘yicha ustozi bizga so‘zlab berdi.

“Zarinaning harakatlari, o‘ziga ishonchi, ichidagi g‘ururi, oldiga qo‘ygan maqsadlari boshqalarga nisbatan kuchliroq. Qo‘li yo‘qligi sababli oyog‘iga ko‘proq e'tibor qaratishini ta'kidlayman. Masalan, biz stolimizni siljitmoqchi bo‘lsak, qo‘limizdan foydalanamiz. Bular esa oyoqlarini ishlatishadi”, – deydi Zarinaning murabbiyi Muhiddin Karimov.

Atrofdagilarning nuqsoniga qarab munosabatda bo‘lishlari uni ba'zan xafa qiladi. Ishga joylashishda, o‘qishga kirishda, umuman barcha jabhada bu muvozanatsizlik uning o‘ylanishiga, ba'zan esa ko‘ngliga og‘ir botishiga sabab bo‘ladi.

Zarina tushkunlikka tushishni istamaydi. U doim harakatda bo‘lishni, oldiga qo‘ygan maqsadlarga erishishiga nuqsoni to‘sqinlik qila olmasligini ta'kidlaydi. Maqsadga yetishish oson emasligini bilsa-da, harakatdan to‘xtamaydi. Tushkunlikka tushgan va yolg‘iz qolishni istagan paytlari ham ko‘p bo‘ladi. Biroq bu sinovni yengib o‘tishda o‘zida doim kuch topadi.

Abduvali Qurbonov,

Tasvirchi va montaj ustasi Azizbek Ismoilov.