Zoyir Mirzayev Toshkent viloyatida aholini qiynayotgan muammolarni sanadi

Toshkent viloyati hokimi vazifasini bajaruvchi Zoyir Mirzayev ayni paytda deputatlar va xalqqa murojaat qilmoqda. U o‘z ma’ruzasida elektr, gaz va ichimlik suv ta’minoti bilan bog‘liq muammolarga ham to‘xtaldi.

Foto: Toshkent viloyati hokimligi

Qayd etilishicha, Toshkent viloyatidagi 170ta mahalla elektr ta’minotida muammolar mavjud. Xususan:

307ta transformator stansiyasining quvvati yetarli emas;
15 mingdan ortiq simyog‘och eskirgan;
1146,7 km elektr liniyalari yaroqsiz holatda.

Tabiiy gaz ta’minoti bo‘yicha ham muammolar yig‘ilib qolgan. Viloyat hokimi 17,3 km gaz tarmoqlari ta’mirtalab ekani, 306ta mahallaga tabiiy gaz yetib bormagani, 10ta mahallada kuz-qish mavsumida gaz bosimi pasayib ketishi odat tusiga kirganini ta’kidlagan.

Zoyir Mirzayev, shuningdek, viloyatning ichimlik suv ta’minoti bor-yo‘g‘i 68 foizni tashkil etishini tanqid qilgan. U aholini ichimlik suv bilan ta’minlash bo‘yicha mavjud statistikani ham ochiqlagan. Unga ko‘ra eng past ko‘rsatkichlar Quyi Chirchiq (16 foiz), Yuqori Chirchiq (22 foiz) va O‘rta Chirchiq (38 foiz) tumanlariga to‘g‘ri keladi.

“Hozirda 144ta mahallada markazlashgan ichimlik suv ta’minoti mavjud emas, 3tasida esa 50 foizdan past. 69ta suv quduqlari ishlamaydi, 2 966 km suv tarmog‘i ta’mirtalab. 14ta maktab uzluksiz ichimlik suv bilan ta’minlanmagan”, deb aytgan Zoyir Mirzayev.