Shoazim Minovarov O‘zbekiston prezidentining jamoat va diniy tashkilotlar bilan hamkorlik masalalari bo‘yicha maslahatchisi lavozimidan ketdi. Uning o‘rnini Muzaffar Komilov egalladi.
O‘zbekiston prezidentining jamoat va diniy tashkilotlar bilan hamkorlik masalalari bo‘yicha maslahatchisi tayinlandi. Bu haqda davlat rahbari matbuot kotibi Sherzod Asadov xabar berdi.
Qayd etilishicha, Shavkat Mirziyoyevning tegishli farmoni bilan Vazirlar Mahkamasi huzuridagi Din ishlari bo‘yicha qo‘mita raisining birinchi o‘rinbosari Muzaffar Komilov prezidentning jamoat va diniy tashkilotlar bilan hamkorlik masalalari bo‘yicha maslahatchisi lavozimiga tayinlandi.
Ma’lumot uchun, Muzaffar Komilov ilgari Oliy va o‘rta maxsus ta’lim vazirligida boshqarma boshlig‘i, Toshkent davlat sharqshunoslik instituti va Toshkent davlat iqtisodiyot universitetlarida prorektor lavozimlarida faoliyat yuritgan.
U 2018 yil 18 apreldan buyon Din ishlari bo‘yicha qo‘mita raisining birinchi o‘rinbosari edi.
Muzaffar Komilov O‘zbekiston xalqaro islom akademiyasi rektori lavozimini saqlab qolgan. U 2021 yil mayida rektorlikka tayinlangandi.
Shoazim Minovarov 1997-2006 yillarda Din ishlari bo‘yicha qo‘mita raisi birinchi o‘rinbosari, raisi bo‘lgan. 2006 yil 1 avgustdan 1 dekabrigacha - O‘zbekiston prezidentining davlat maslahatchisi, 2006 yil 1 dekabrdan 2008 yil 28 iyungacha - O‘zbekiston tashqi ishlar vazirining o‘rinbosari sifatida ishlagan.
U 2008-2012 yillarda O‘zbekistonning Misrdagi elchisi bo‘lgan, 2013 yilda pensiyaga chiqarilgan. 2015 yildan 2017 yil yozigacha Toshkentdagi Fransuz alyansi raisi bo‘lgan. 2017 yil iyul oyida Islom madaniyati markazining direktori etib tayinlangan.
Shoazim Minovarov 2021 yil mayida Rustam Qosimov vafot etgach, uning o‘rniga prezident maslahatchisi lavozimini egallagandi. U endi O‘zbekiston Islom sivilizatsiyasi markazi rahbari sifatida faoliyatini davom ettiradi.
