Baliqchi tumanining Tumor qishlog‘i xonadonlarida 10-20tadan bo‘rdoqi novvos boqiladi. Biz bozorlarini go‘sht mahsulotiga to‘ldirishga salmoqli hissa qo‘shayotgan xonadonlarning tajribasi bilan tanishdik.
Tumordagi Abdusaminjon Xusainov xonadonida 6 sotix joyda naq 60ta novvos parvarishlanmoqda.
Abdusaminjon Husainov o‘z qoramollari boqilayotgan sharoit bilan tanishtirdi. Molxonada derli bir xil yoshdagi novvoslar yemlab boqilmoqda. Abdusaminjonning yosh novvoschalarni tez yetishtirish bo‘yicha o‘ziga hos texnologiyasi bor.
“Chorvaga qiziqishi bo‘lmagan odam mol boqa olmaydi. Yoshligimdan qoramol boqishga qiziqaman. Shu olti sotixlik uchastkamizda molxona tashkil qilib, novvoslar sonini oltmish boshga yetkazdik.
Novvos boqishimizni sababi, novvos tez yetiladi va tez daromadga kiradi.
Boshqalar uchun bilmadim-ku, men uchun novvos boqish qiyin ish emas. Sharoitlarni yaratib olib, ikki mahal yem, o‘ti, suvi berib turilsa bo‘ldi.
Asosan Qirg‘izistondan zotli ikki yoshga yetgan novvoschalarni olib kelamiz. Qarovini qilib, dori-darmon vaqtida berib tursak, olti oyda yetilib daromadga kiradi. Chorvamiz doimiy veterinar nazoratida boqiladi”, deydi Abdusaminjon Husainov.
Chorvador bizga uch oy oldin 9 mln so‘mga olingan novvosni ko‘rsatdi. Uning aytishicha, yana uch oydan so‘ng yetilgan novvosning narxi 19 millionga chiqar ekan.
Olti sotix yerning barchasi ham molxona emas. Maydonning bir qismiga kuz oylarida silos o‘ra qilinib, 150 tonna silos jamlab qo‘yilgan. Qoramollar asosan silos va omuxta yem bilan boqiladi. Kichik navesda kepak, sheluxa saqlanar ekan.
