Zelenskiy Putinga murojaat qildi

Ukraina prezidenti Vladimir Zelenskiy navbatdagi chiqishi vaqtida Rossiya prezidenti Vladimir Putinga murojaat qilib, uni muzokara o‘tkazishga chaqirdi.

«Rossiyaning Ukrainaga bostirib kirishi shunchaki bosqin emas, bu Yevropa va uning birligiga ochilgan urushdir. Insonlarning juda oddiy huquqlariga qarshi, Yevropada amalda bo‘lgan barcha odatlarga qarshi urush. Yevropa davlati chegarani kuch bilan taqsimlashga qarshi chiqqani uchun ochilgan urush», dedi u.

Zelenckiy yana bir bor rossiyaliklarga murojaat qildi. «Maydonlarga chiqing, urush tugashini talab qiling. Bu sizning va bizning huquqimiz», dedi u rus tilida.

Ukraina prezidenti Yevropa davlatlarini Ukrainaga yordam ko‘rsatishda qat’iyatliroq bo‘lishga chaqirdi: «Bizga bunchalik sust yordam beryapsiz, o‘zingizni qanday himoya qilasiz? Bizga ko‘proq yordam bering».

So‘zi oxirida esa Vladimir Zelenskiy Putinga uning ismini aytmay murojaat qildi.

«Rossiya prezidentiga murojaat qilmoqchiman. Butun Ukraina bo‘ylab urush ketmoqda. Keling, muzokara stoliga o‘tiramiz. Odamlar o‘lib ketishining oldini olish uchun», dedi Zelenskiy yana rus tilida.

• Oldinroq Rossiya tashqi ishlar vaziri Sergey Lavrov Rossiya Ukraina bilan har qanday vaqtda muzokara o‘tkazishga tayyorligi, bu uchun Ukraina harbiylari qurolni tashlab taslim bo‘lishi kerakligini aytgandi.
• Shuningdek, Xitoy nashrlarida Putin Xitoy rahbari Si Jinping bilan telefon muloqot o‘tkazgani, u bilan suhbatda Ukraina bilan yuqori darajada muzokara o‘tkazishga tayyorligini aytgani haqida xabarlar berilmoqda.