Ukrainadan Polsha orqali evakuatsiya qilingan o‘zbekistonliklar soni 6 mingga yaqinlashdi

15 mart kuni Ukrainadan Polshaning Katovitse aeroporti orqali 250 nafar O‘zbekiston fuqarosi, shu jumladan, 43 nafar ayol, 20 nafar voyaga yetmagan shaxs va 8 nafar chaqaloq olib kelindi. Bu haqda O‘zbekiston TIV rasmiy vakili xabar berdi.

Ma’lum qilinishicha, 28 fevraldan 15 martga qadar 26 ta aviareys tashkillashtirilgan. Diplomatik vakolatxonalarning faol sa’y-harakatlari natijasida harbiy harakatlar bo‘layotgan hududdan 5 884 nafar O‘zbekiston fuqarosi olib chiqilgan. Jumladan 300 nafar ayol, 700 dan ziyod 14 yoshgacha bo‘lgan bolalar, 40 nafar imkoniyati cheklangan shaxslar, shuningdek, talabalar va mehnat migrantlari.

O‘zbekistonning Ukrainadagi elchixonasi (vaqtincha Lvov shahrida joylashgan) mamlakatning chekka hududlarida bo‘lib turgan O‘zbekiston fuqarolarini evakuatsiya punktlariga olib kelish yuzasidan yordam ko‘rsatmoqda.

O‘zbekistonning Polshadagi elchixonasi tomonidan hujjati yo‘q 322 nafar fuqaroga vatanga qaytishi uchun sertifikatlar rasmiylashtirgan.