Foto: Kuchli yomg‘ir tufayli Baxt shahridagi xonadonlarni suv bosdi. Aholi vaqtincha ko‘chirilmoqda

Favqulodda vaziyatlar vazirligining xabar berishicha, yuzaga kelayotgan surunkali yog‘ingarchiliklar tufayli Sirdaryo tumanidagi xo‘jaliklararo kollektorining Baxt shaharchasi hududidan oqib o‘tuvchi qismida suv sathi me’yoridan oshib ketgan. Oqibatda, qishloq xo‘jaligining shudgor yerlari, mahallalar va aholi yashash xonadonlarini suv bosgan.

Jumladan, Baxt shahri “Xazina” MFYning Hamiyatli ko‘chasida 21 ta, Tarovatli ko‘chasida 7 ta, Ulug‘ yo‘l ko‘chasida 35 ta, Peshqadam ko‘chasida 12 ta, Yangi qurilish ko‘chasida 27 ta xonadonga suv kirgan. 

Zudlik bilan vaziyat oqibatlarini bartaraf etish maqsadida Baxt shahri IIBda tezkor shtab tashkil etilib, tuman hokimligi, FVB, IIB, MG xodimlari va mahalla vakillaridan iborat 3 ta ishchi guruh tuzilgan.

Ishchi guruh tomonidan suv toshgan xonadonlar aholisini xavfsiz hududlarga ko‘chirish haqida ogohlantirish xatlari berilib, “Xazina” MFYdan 20 ta xonadonda yashovchi 68 nafar fuqaro vaqtinchalik yaqin qarindoshlari xonadonlariga ko‘chirilgan. Ko‘chirilgan aholi uchun tibbiy va boshqa ta’minot tadbirlari tashkil etilgan.

Yuzaga kelgan suv toshish oqibatlarini bartaraf etish uchun viloyat Favqulodda vaziyatlar boshqarmasi, Avtoyo‘l xizmati, Suv xo‘jaligi vazirligi viloyat tuzilmalari kuch va vositalari jalb qilingan.   

Shuningdek, voqea joyiga Favqulodda vaziyatlar vaziri boshchiligida Maxsus vazifalar bo‘yicha respublika qutqaruv markazidan qutqaruvchilar yetib borgan. Bundan tashqari, Jizzax va Toshkent viloyatlari FVBlaridan qo‘shimcha kuch va vositalar safarbar etilib, hozirda suvni chiqarish ishlari olib borilmoqda.