Xitoy Rossiya nefti va ko‘miri uchun yuanda pul to‘ladi

Xitoy iqtisodiy sanksiyalar bois energiya resurslari uchun yuanda pul to‘lashga o‘tishga qaror qildi.

Foto: Bloomberg

Xitoydagi ayrim importyorlar Rossiya nefti va ko‘miri importi uchun yuanda to‘lov qilishga o‘tdi, deb xabar berdi Bloomberg.

Xabarda aytilishicha, bir nechta kompaniya aprel oyida olinadigan ko‘mir uchun mart oyida yuanda pul to‘lagan. Yuanga sotib olingan neft esa may oyida yetkazib berilishi aytilmoqda.

Xitoy iqtisodiy sanksiyalar bois energiya resurslari uchun yuanda pul to‘lashga o‘tishga qaror qildi. Rossiyaning qator banklari SWIFT tizimidan uzilganidan so‘ng xalqaro pul o‘tkazmalarini amalga oshirish qiyinlashdi.

Ma’lumot berilishicha, Rossiya o‘tgan yili Xitoyga ko‘mir yetkazib berish bo‘yicha ikkinchi o‘rinni egallagan.

Avvalroq MDH ijroiya qo‘mitasi raisining birinchi o‘rinbosari Leonid Anfimov hamdo‘stlik mamlakatlari o‘zaro hisob-kitoblarda dollar va yevro o‘rniga Xitoy yuanidan foydalanishi mumkinligini aytgandi.