Pensiyani plastik karta orqali oluvchilarga qo‘shimcha 1 foiz haq to‘lanadi

Prezident “Davlat pensiyalari, nafaqalar, kompensatsiyalar va boshqa ijtimoiy to‘lovlarni to‘lash tizimini yanada takomillashtirishga doir qo‘shimcha chora-tadbirlar to‘g‘risida”gi qarorni imzoladi.

Qarorga asosan, 2022 yil 1 maydan boshlab:

— barcha turdagi davlat pensiyalarini, budjetdan tashqari Pensiya jamg‘armasi tomonidan to‘lanadigan nafaqalar, kompensatsiyalar va boshqa to‘lovlarni hamda kam ta’minlangan oilalar uchun bolalar nafaqasi va moddiy yordam pulini bank kartalari orqali oluvchilarga har oylik pensiya va nafaqa pulining 1 foizi miqdorida qo‘shimcha to‘lov joriy qilinadi. Bunda, fuqarolarning roziligi bilan pensiya va nafaqa pullarini bank kartalariga o‘tkazish asosida hujjatlarni qog‘oz shaklida yuritishdan voz kechiladi;

—  “Xalq banki” zimmasiga sayyor kassalar orqali mahalla fuqarolar yig‘inlariga borgan holda pensiya va nafaqa oluvchilarning kartalaridagi mablag‘larini ularning xohishlariga ko‘ra naqd pulga almashtirib berish vazifasi yuklatiladi;

— “Xalq banki”ning sayyor kassalari tomonidan pensiya va nafaqalar hamda moddiy yordam pullarini fuqarolarga naqd pulda yetkazib berish xizmatlari uchun bankka 1 foiz miqdorda xizmat haqi budjetdan to‘lab beriladi;

— “Temir daftar”, “Yoshlar daftari” va “Ayollar daftari”ga kiritilgan fuqarolarga va oilalarga tegishli jamg‘armalar mablag‘lari hisobidan ko‘rsatiladigan moddiy yordamlar, mehnat organlari tomonidan to‘lanadigan ishsizlik nafaqasi va stipendiyalar hamda jazoni o‘tab ozodlikka chiqqan fuqarolarga to‘lanadigan moddiy yordam pullari har oyning 5-sanasiga qadar moliyalashtiriladi hamda pensiya va nafaqalar bilan bir vaqtda “Xalq banki”ning sayyor kassalari tomonidan mahallalarga yetkaziladi;

2022 yil 1 sentabrga qadar harbiylashtirilgan tizim pensiyalarini hisoblash va ularning to‘lov hisob-kitoblari tizimini tegishli vazirlik va idoralar tomonidan avtomatlashtirish orqali xizmat ko‘rsatuvchi tijorat banklarida pensiya varaqalarini yuritish amaliyoti bekor qilinadi.

AT “Xalq banki”:

— Markaziy bank bilan birgalikda aholini bankomatlar bilan qamrab olish darajasini oshirish maqsadida 2022 yilning 1 oktyabriga qadar xorijdan 1 800 ta bankomat olib kelgan holda, ularning hududlar, shu jumladan, olis tumanlarda o‘rnatilishini ta’minlaydi;

— 2022 yil yakuniga qadar pensiya va nafaqa oluvchilarga yanada qulayliklar yaratish maqsadida ularning mablag‘larini masofadan boshqarish imkonini beruvchi bankning yangi mobil ilovasini ishlab chiqadi;

— Adliya vazirligi tomonidan aholiga ko‘rsatiladigan xizmatlarni bankning mobil ilovasi orqali amalga oshirilishini yo‘lga qo‘yadi.

Iqtisodchi Otabek Bakirov izohlashicha, 1 maydan boshlab bank kartalari orqali oluvchilarga har oylik pensiya va nafaqa pulining 1 foizi miqdorida qo‘shimcha to‘lov to‘lab beriladi.

“Ya’ni, pensionerlar kartasiga 1 foiz ortiqcha pul kelib tushadi. AT “Xalq banki”ning sayyor kassalari fuqarolarga naqd pulda yetkazib berish xizmatlari uchun 1 foiz miqdorda haq oladi. Boshqacha aytganda, pensiyasini naqd pulda oladiganlar uchun hech narsa o‘zgarmaydi, naqd pul kerak bo‘lmagan pensionerlar uchun pensiya summasi 1 foizga ko‘payadi”, deydi u.