Qashqadaryoda soliqchi viloyat hokimiga birinchi o‘rinbosar bo‘ldi

Alisher Abdulahatovich Qodirov Qashqadaryo viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari - viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimiga tayinlandi.

Alisher Qodirov 1975 yil Qarshi shahrida tug‘ilgan.  1994 yilda Samarqand moliya texnikumini, 2004 yilda Qarshi muhandislik-iqtisodiyot institutini, 2009 yilda Toshkent davlat yuridik institutini tamomlagan. Soliq xizmatining I darajali maslahatchisi.

U mehnat faoliyatini 1992 yilda Qarshi shahar davlat soliq inspeksiyasi Soliq tushumlarini jamlash va nazorat qilish bo‘limi davlat soliq inspektorligidan boshlagan.

2021 yil iyul oyidan buyon Qashqadaryo viloyati davlat soliq boshqarmasi boshlig‘i lavozimida ishlab kelayotgandi.

Qayd etish kerakki, Qashqadaryo viloyati hokimining avvalgi birinchi o‘rinbosari ham soliqchi edi. Muqaddam Toshkent shahar davlat soliq boshqarmasi boshlig‘ining birinchi o‘rinbosari bo‘lgan Nodir Erkayev 2021 yil aprelida Qashqadaryo viloyati hokimining moliya-iqtisod masalalari bo‘yicha birinchi o‘rinbosari lavozimiga tayinlangandi, u 2022 yil 19 aprelida viloyatning Chiroqchi tumani hokimi lavozimiga o‘tkazildi.