Qashqadaryodan Toshkentga olib ketilayotgan 830 kilogramm iste’molga yaroqsiz go‘sht to‘xtatib qolindi

Go‘sht laboratoriyada tekshirib ko‘rilganda iste’molga yaroqsizligi ma’lum bo‘lgan.

Foto: Qashqadaryo viloyati IIB axborot xizmati

Qashqadaryo viloyati IIB axborot xizmatining xabar berishicha, 2022 yil 30 may kuni soat 23:30 larda Qashqadaryo-Toshkent yo‘nalishida harakatlanib kelgan Cobalt mashinasi viloyat IIB JXX JTSB Karantin bo‘linmasi va YHXB xodimlari tomonidan Ko‘kdala tuman hududida joylashgan “Umakay” muntazam YPX maskanida to‘xtatilgan.

Chiroqchi tumanida yashovchi D.A. boshqaruvida bo‘lgan mashina yukxonasi tegishli tartibda ko‘zdan kechirilganda u yerda tegishli veterinariya ma’lumotnomasi bo‘lmagan, kelib chiqishi noma’lum bo‘lgan, 830 kilogramm og‘irlikdagi go‘sht borligi aniqlangan.

Mazkur go‘sht viloyat oziq-ovqat mahsulotlari xavfsizligi mikrobiologiya va veterinariya-sanitariya ekspertiza laboratoriyasida tekshirib ko‘rilganda iste’molga yaroqsizligi ma’lum bo‘lgan.

Avvalroq, Sirdaryo viloyatida Qashqadaryo va Samarqand viloyatlaridan Toshkentga olib ketilayotgan 1 tonnadan oshiq iste’molga yaroqsiz go‘sht to‘xtatib qolingandi.

#Qashqadaryo #go‘sht