Elektrotexnika tarmog‘ida ilmiy-tadqiqot va tajriba-konstruktorlik markazlari tashkil etiladi

Innovatsion rivojlanish vazirligi va «O‘zeltexsanoat» uyushmasining elektrotexnika tarmog‘ida ilmiy-tadqiqot va tajriba-konstruktorlik markazlarini tashkil etish takliflari ma’qullanadi.

Elektrotexnika sohasida faoliyat yuritayotgan korxonalarga, joriy etiladigan iqtisodiy rag‘batlantirish preferensiyalardan kelib chiqib, o‘z tarkiblarida ilmiy-tadqiqot va tajriba-konstruktorlik markazlarini tashkil etish tavsiya etiladi.

Elektrotexnika tarmog‘ida tashkil etiladigan ilmiy-tadqiqot va tajriba-konstruktorlik markazlari faoliyat yo‘nalishlari va asosiy vazifalari etib quyidagilar belgilanadi:

yuqori texnologiyali sanoatni yaratishga xizmat qiladigan tadqiqotlarni olib borish;

tarmoq raqobatbardoshligini yanada oshirish maqsadida ilmiy faoliyat natijalarini ishlab chiqarishda sinovlarni tashkil etish va o‘tkazish;

ichki bozor ehtiyojlarini hisobga olgan holda import o‘rnini bosuvchi, energiya tejamkor, arzon va sifatli elektrotexnika va maishiy mahsulotlarni yaratish, ularning sinov ishlarini tashkil etish;

korxonalar texnologik jarayonlarini modellashtirish hamda rivojlantirish va optimallashtirish bo‘yicha takliflar ishlab chiqish;

mahsulot sifat ko‘rsatkichlarini oshirish, assortimentni kengaytirish bo‘yicha yangi texnologiyalarni ishlab chiqishga tadqiqotlarni yo‘naltirish;

mahsulot bozori kon’yunkturasini tahlil qilish va barcha innovatsion usullardan xabardor bo‘lib turish;

tadqiqot-sinov laboratoriya uskunalarini yaratish,

tajriba almashish va ilmiy-tadqiqot bazasini takomillashtirish bo‘yicha takliflar olish uchun mahalliy va xalqaro miqyosda tan olingan soha olimlari, mutaxassislar va soha ekspertlarini jalb qilish;

milliy mahsulotlar raqobatbardoshligini oshirish maqsadida xorijda shu kabi mahsulotlarni ishlab chiqarish bo‘yicha moslama va qurilmalar ishlash mexanizmlari va prinsiplarini o‘rganish;

korxonada ishlab chiqarilayotgan mahsulotlar tannarxini pasaytirishga, energiya samaradorlikka oid texnik va texnologik yechimlar sinovlarini tashkil etish;

ilmiy ishlanmalar asosida prototiplar yaratish va pilot qurilmalarni joriy qilish va tajribalarni o‘tkazish;

tashqi va ichki innovatsion g‘oyalar bazasini (portalini) shakllantirish;

maxsus ko‘rsatkichlarga ega brend mahsulotlarni prototiplash va ularni sinash;

korxona biznes ko‘rsatkichlarini oshirish maqsadida texnologik jarayonlarni modellashtirish.

2025 yilning 1 yanvariga qadar elektrotexnika tarmog‘i korxonalari belgilangan tartibda shakllantirilgan ro‘yxatlar bo‘yicha o‘z ishlab chiqarish ehtiyoji uchun olib kelinadigan, O‘zbekistonda ishlab chiqarilmaydigan xomashyo, materiallar, butlovchi qismlar va asbob-uskunalar bo‘yicha bojxona to‘lovlari (bojxona rasmiylashtiruvi uchun olinadigan yig‘im hamda QQSdan tashqari) to‘lashdan ozod etiladi.