Prezident O‘zbekiston aeroportlariga investorlar jalb etish hamda mamlakat hududlari o‘rtasida qatnovlarni oshirish bo‘yicha ishlar qoniqarsizligini ta’kidladi.
O‘zbekiston prezidenti Shavkat Mirziyoyev videoselektorda transport sohasiga xususiy investorlarni jalb qilish ishlari sustligini tanqid qildi.
Prezident matbuot xizmati xabar berishicha, yig‘ilishda aeroportlarga xususiy sheriklik asosida investorlarni jalb qilish ishlari hamda Toshkent-Samarqand va Toshkent-Andijon yo‘nalishidagi tezyurar avtomobil yo‘llarini qurish bo‘yicha xususiy sheriklik loyihalari qoniqarsizligi, shuningdek, hududlar o‘rtasida avia, temiryo‘l va avtotransport qatnovlarini ko‘paytirish ishlari o‘z holiga tashlab qo‘yilgani ko‘rsatib o‘tildi va transport vaziri Ilhom Mahkamovga oxirgi marta ogohlantirish berildi.
Transport vazirligi va Uzbekistan Airports’ga:
- 1 iyulga qadar aeroportlarga xususiy sheriklik asosida investor hamda ichki aviaqatnovlar uchun loukosterlarni jalb qilish bo‘yicha amaliy ishlarni boshlash;
- 1 avgustga qadar ichki aviaqatnovlarni haftasiga 90 taga ko‘paytirish topshirildi.
Temiryo‘l tizimi transformatsiyasini jadallashtirish zarurligi qayd etildi.
Avtomobil yo‘llari sohasida qurilish sifati va ajratilayotgan mablag‘lar nazorati bo‘yicha takliflar ishlab chiqish vazifasi qo‘yildi.
