Yangi o‘quv yili uchun kvotalar tasdiqlandi. Qabul 20 iyundan boshlanadi

2022/23 yilgi o‘quv yili uchun O‘zbekiston OTMlariga qabul kvotalari tasdiqlandi.

Prezidentning tegishli farmoyishiga asosan, yangi o‘quv yilida bakalavriatga quyidagicha miqdorda talaba qabul qilinadi:

• kunduzgi shaklda 77 477 nafar;
• sirtqi shaklda 26 095 nafar;
• kechki shaklga 3 725 nafar;
• yangi turdagi masofaviy ta’lim shakliga 3 410 nafar.

Magistratura uchun qabul 10 688 nafar etib belgilangan.

Qabul jarayonlarini tashkil etish to‘g‘risida prezident qarori e’lon qilindi. Unga ko‘ra, yangi o‘quv mavsumida qabul 20 iyundan boshlanadigan bo‘ldi.

Qabul jarayonida abituriyentlarni onlayn ro‘yxatdan o‘tkazish Yagona interaktiv davlat xizmatlari portali va DTM rasmiy sayti orqali har yili 20 iyundan 20 iyulga qadar (20 iyul kuni ham), chet tili fanidan kasbiy (ijodiy) imtihon o‘tkaziladigan bakalavriat ta’lim yo‘nalishlari bo‘yicha esa 10 iyulga qadar (10 iyul kuni ham) amalga oshiriladi.

Endilikda OTMga imtihonlarsiz davlat granti asosida o‘qishga kirish bo‘yicha imtiyozga ega shaxslar umumiy qabul parametrlaridan tashqari, qo‘shimcha davlat granti asosida o‘qishga qabul qilinadi. Ya’ni ular umumiy kvotadan joy band qilmaydi.

Qarorda o‘qishni ko‘chirish bo‘yicha yangi tartib ham belgilangan. Unga ko‘ra, davlat OTMsining biridan boshqasiga talabalar o‘qishini ko‘chirishga faqatgina quyidagi holatlarda ruxsat beriladi:

1. Talaba oila qurishi munosabati bilan turmush o‘rtog‘i doimiy yashaydigan hududdagi oliy ta’lim muassasasiga o‘qishini ko‘chirish uchun murojaat qilganda;
2. Davlat organlarining xodimlari ish joyi o‘zgargan taqdirda uning turmush o‘rtog‘i yoki voyaga yetmagan farzandi o‘qishini ko‘chirish uchun murojaat qilganda, tegishli vazirlik (idora) rahbarining tavsiyasi asosida.

Boshqa hollarda bir davlat OTMdan boshqasiga (hududidan qat’i nazar) o‘qishni ko‘chirishga ruxsat etilmaydi. Xorijdan va O‘zbekistondagi xorijiy va nodavlat OTMlardan o‘qishni ko‘chirishda amaldagi tartib saqlanib qolgan.