Konstitutsiyada Qoraqalpog‘istonga oid moddalar o‘zgarishsiz qoldiriladi

Konstitutsiyaga o‘zgartish va qo‘shimchalar kiritishga oid qonun loyihasidan Qoraqalpog‘iston Respublikasi maqomiga oid qismi chiqarildi. Bu haqda Oliy Majlis Qonunchilik palatasining navbatdagi majlisida ma’lum qilindi.

Yig‘ilishda bugungi kunga qadar Konstitutsiyasiga o‘zgartish va qo‘shimchalar kiritish to‘g‘risidagi qonun loyihasi yuzasidan aholi va fuqarolik jamiyati institutlaridan 60 mingga yaqin taklif kelib tushgani ta’kidlandi.

Qonunchilik palatasi «O‘zbekiston Respublikasining Konstitutsiyasiga o‘zgartish va qo‘shimchalar kiritish to‘g‘risida»gi Konstitutsiyaviy qonun loyihasi umumxalq muhokamasining muddatini yana 10 kunga - 2022 yil 15 iyulgacha uzaytirish haqida qaror qabul qildi.

Deputatlar O‘zbekiston Respublikasining prezidenti tomonidan Qoraqalpog‘iston Respublikasi Jo‘qorg‘i Kengesi deputatlari hamda Qoraqalpog‘iston Respublikasi faollari bilan bo‘lib o‘tgan uchrashuvda bildirilgan takliflarni inobatga olish zarur deb topishdi.

Ya’ni O‘zbekiston Respublikasi Konstitutsiyasining 70, 71, 72, 74 va 75-moddalari o‘zgarishsiz qoldirilib, amaldagi normalarni saqlab qolish maqsadga muvofiq ko‘rildi.

3 iyul kuni Nukusda faollar bilan uchrashuvda prezident Shavkat Mirziyoyev Konstitutsiya faqat O‘zbekiston xalqining taklif va fikrlari asosida o‘zgartiriladi hamda takomilga yetkazilishini, Qoraqalpog‘iston Respublikasining huquqiy maqomiga oid 70, 71, 72, 74, 75-moddalarni amaldagi tahrirda, o‘zgartirmasdan qoldirishni taklif etganini aytgandi.