Qozog‘istondagi yirik YTHda halok bo‘lganlar orasida O‘zbekiston fuqarolari yo‘qligi ma’lum bo‘ldi

O‘zbekiston Favqulodda vaziyatlar vazirligi Qozog‘istonda sodir bo‘lgan yo‘l-transport hodisasi yuzasidan qo‘shimcha ma’lumot berdi.

Bugun, 16 iyul kuni Qozog‘istonning Qarag‘anda oblasti, Shetskiy tumanida “Man” yuk mashinasi va Mercedes-Benz Sprinter yo‘lovchi mikroavtobusi to‘qnashishi oqibatida yo‘l-transport hodisasi sodir bo‘lgan.

O‘rganish natijalariga ko‘ra, Mercedes-Benz Sprinter mikroavtobusi salonida bo‘lgan 18 nafar yo‘lovchidan 8 nafari - Qozog‘iston fuqarolari voqea joyida vafot etgan, halok bo‘lgan fuqarolar shaxsiga aniqliklar kiritilganida ular orasida O‘zbekiston fuqarolari yo‘q ekani aniqlangan.

Shuningdek, 10 kishi turli darajalarda tan jarohati olgan, ularning 5 nafari O‘zbekiston fuqarolari bo‘lib, ayni vaqtda ularga Aksu-Ayuli qishloq kasalxonasida malakali tibbiy xizmat ko‘rsatilmoqda. Ulardan 1 nafariga ambulator davolanish uchun ruxsat berilgan.

FVV tomonidan avvalgi berilgan birlamchi shoshilinch xabarda 2 nafar O‘zbekiston fuqarosi halok bo‘lgani aytilgandi. 

Qozog‘iston mas’ul xizmatlari tomonidan mukammal o‘rganilib, fuqarolarning shaxsiga aniqliklar kiritilganda, halok bo‘lganlar orasida O‘zbekiston fuqarolari yo‘qligi ma’lum bo‘ldi.