Krishtianu Ronaldu iztirobda, klublar portugaliyalikni birin-ketin rad etmoqda

Rossiyaning «Chempionat» sayti kolumnisti Mixail Georgiyev hujumchining mavsumlar oralig‘idagi «sarguzashtlari»ni tahlil qildi.

Krishtianu Ronaldu «Manchester Yunayted»ni tark etib, Chempionlar Ligasida ishtirok etuvchi klubga o‘tmoqchi. Futbolchining agenti Jorjye Mendesh mijozining xizmatini Yevropaning top-klublariga faol ravishda taklif qilmoqda. Juda faol tarzda.

Ronaldu uchun «Bavariya» va «Atletiko» variantlari tasdiqlanmadi

Ba’zi taniqli shaxslar klub Ronalduga muhtoj emasligi haqida jamoatchilik oldida fikr bildirishdan o‘zlarini tiya olishmadi. «Bavariya»ning bir emas, uch vakili Krishtianuning Myunxenga o‘tishi amalga oshmasligini ta’kidlashga majbur bo‘ldi. Aftidan, bu boradagi mish-mishlarga barham berish uchun.

«Men Krishtianu Ronalduni, uning yutuqlari va karerasini juda hurmat qilaman. Ammo yana bir bor aytaman, uning transferi bizning rejalarimizda yo‘q va bo‘lmagan ham», dedi «Bavariya» sport direktori Hasan Salihamijich.

«Men Krishtianu Ronalduni «Bavariya»ga sotib olish istagim borligi haqida o‘qidim, ammo bu yolg‘on», dedi bosh murabbiy Yulian Nagelsman.

«Men Krishtianu Ronalduni yaxshi ko‘raman. U fantastik o‘yinchi, lekin har bir klubning o‘z falsafasi bor. Men uning transferi hozir «Bavariya» va Bundesliga uchun to‘g‘ri bo‘lishiga ishonchim komil emas. Bunday transfer g‘oyalarimizga to‘liq mos kelmaydi», dedi myunxenliklar bosh direktori Oliver Kan.

Oliverning so‘zlarida rasmiy uslub sezilib turibdi, ammo ma’lum miqdorda istehzo va asabiylik ham bor. Ronaldu «Bavariya»ga kerak emas. Va boshqa top-klublarga ham. Aftidan, Mendeshning Krishtianu xizmatlarini taklif qilish bo‘yicha urinishlari boshi berk ko‘chaga kirib qolgan.

«Bavariya»dan keyin «Atletiko» dostoni boshlandi, ammo bu ham uzoq davom etmadi. Madrid klubi Marca nashriga ehtimoliy transfer iqtisodiy jihatdan imkonsiz va foyda keltirmasligini aytdi. Ayni damda «matraschilar» portugaliyalikning yuqori maoshini ham, transfer narxini ham ko‘tara olmaydi. Nashrning yozishicha, hujumchining Madridga (bundan oldin Myunxenga) o‘tishi haqidagi mish-mishlarni Ronalduning atrofidagilar, xususan agenti Jorjye Mendesh tarqatmoqda.

«Atletiko» Krishtianuning transferi g‘oyasini darhol rad etdi. Tomonlar o‘rtasida norasmiy aloqalar bo‘lgan, ammo bundan ortig‘i emas. «Matraschilar» bosh murabbiyi Diyego Simeone Ronalduni hurmat qiladi, biroq u portugaliyalik bilan ishlash imkoniyati uchun jamoani qayta shakllantirmoqchi va qayta qurmoqchi emas. Mendeshning qitmirligi hech qanday natija bermadi, faqat «Atletiko» muxlislarini g‘azablantirdi.

«Krishtianu Ronalduga klubimiz futbolkasini kiyish taqiqlangan. U «Atletiko» muxlislarini hech qachon hurmat qilmagan va ustidan kulgan futbolchi. U ko‘p yillar davomida asosiy raqibimiz hujumchisi bo‘lgan, eng sevimli futbolchilarimiz bilan ko‘p to‘qnash kelgan. Krishtianu Ronaldu – «Atletiko» falsafasiga mutlaqo zid», dedi «Atletiko» muxlislar harakati vakili Jonatan Fernandes The Sun nashriga.

Boshqa top-klublar ham Krishtianuga qiziqmayapti

Diario Sport nashri xabariga ko‘ra, Krishtianuning rafiqasi Jorjina Rodriges uni Ispaniyaga qaytishga undamoqda. Ronaldu va Rodriges o‘rtasidagi munosabatlar 2016 yilda, Krishtianu «Real»da o‘ynagan paytda Madridda boshlangan. Ikki yildan so‘ng ular Turinga, uch yildan keyin esa Manchesterga ko‘chib o‘tishdi. Jorjina tez-tez ko‘chib o‘tishlar bolalar uchun yaxshi emasligidan xavotirda. Er-xotin besh farzandni tarbiyalamoqda. Futbolchi uning talabiga qarshi emas, ammo Chempionlar Ligasida o‘ynash istagini ham unutmayapti.

«O‘tgan hafta Ronaldu bilan gaplashdim va uning «Manchester Yunayted» safida boshqa o‘yin o‘tkazishi dargumon. O‘ylaymanki, u ruhiy jihatdan allaqachon keyingi qadamni bosgan. O‘ylaymanki, u butunlay kutilmagan joyga tushib qolishi mumkin», deb yozdi britaniyalik jurnalist Pirs Morgan.

Agar Ronaldu «Real»dagi o‘tmishini unutib, «Atletiko»ga o‘tishga tayyor bo‘lsa, uning qay darajada tushkunlikka tushganini tasavvur qilish mumkin.

Krishtianu yaqinda «Barselona»ga o‘tishga ham rozi bo‘lgan edi, ammo u yerda transfer haqidagi g‘oyadan tezda voz kechishdi. «Real» esa Krishtianu jamoaga to‘g‘ri kelmasligini anchadan beri bildirib kelmoqda. Ispaniyadan Chempionlar Ligasining to‘rtinchi ishtirokchisi bo‘lgan faqat «Sevilya» qoldi, ammo Ronalduning o‘zi hali bunday nisbatan kuchsiz jamoalarda o‘ynashga tayyor emas.

Krishtianuning Pireneyda boshqa varianti ham bor edi – vatani Portugaliyadagi qadrdon «Sporting». Ammo hujumchi shaxsan ijtimoiy tarmoqdagi izohi orqali bu mish-mishlarga chek qo‘ydi.

Uzoq vaqt davomida «Chelsi» varianti ham bor edi. Biroq, ESPN xabariga ko‘ra, London klubi vinger Rahim Sterling bilan shartnoma imzolaganidan so‘ng, bunday transfer imkoniyati yo‘qqa chiqdi.

«PSJ» ham Krishtianuni sotib olmoqchi emas. Italiyada esa Yevropa Ligasida ishtirok etuvchi «Roma»dan tashqari barcha variantlar imkonsiz bo‘lib chiqdi. Krishtianu asabiylashib, katta pul evaziga Saudiya Arabistoniga ketishi mumkin edi, ammo bu variant unga yaqin yillarda qiziq emas.

«Manchester Yunayted» mavsumoldi yig‘inini Ronaldusiz ajoyib boshladi. Bu Krishtianu uchun yomon belgi

Ayni paytda «Manchester Yunayted» Erik ten Hag qo‘l ostida mavsumoldi safarini muvaffaqiyatli o‘tkazmoqda. Uchta o‘rtoqlik o‘yinida «Manchester Yunayted» umumiy 11:2 hisobida g‘alaba qozondi. Raqiblar «Liverpul» (4:0), «Melburn Viktori» (4:1) va «Kristal Pelas» (3:1) klublari edi. Barcha o‘yinlarda hujumchi Antoni Marsiyal gol urishga muvaffaq bo‘ldi. Uchta o‘yinning ikkitasida Markus Reshford raqib darvozasini ishg‘ol etdi.

Krishtianu ta’tildan keyin hamon «Manchester Yunayted»ga qaytmagan. Hozir taktikalar tuzilmoqda, jamoaviy o‘yin shakllantirilmoqda. Marsiyal, Sancho va Reshforddan iborat hujum triosi ajoyib mehnat qilmoqda. 37 yoshli Ronaldu esa yangi klub topishga shoshilmoqda. Hozircha ten Hag vazmin. Murabbiy Krishtianuni top-professional deb atadi va o‘z jamoasida o‘ynashga ishtiyoqi yo‘q futbolchining formasi haqida qayg‘urmayapti. Ammo ertami-kechmi Ronalduning xatti-harakati uning ham jahlini chiqarishi mumkin.

Oxir oqibat, Krishtianu keyingi mavsumda «Manchester Yunayted» tarkibida Yevropa Ligasida o‘ynashga rozi bo‘lishi mumkin. Ammo klubning o‘zi uning qaytishiga qarshi bo‘lib, «Roma» yoki boshqa klubga sotib yuborsachi?

Portugaliyalik yulduzning xatti-harakatlarini «Manchester Yunayted», ten Hag va jamoadoshlariga nisbatan to‘g‘ri deb aytish qiyin. Krishtianuning ruhiy iztiroblari esa odamni charchatmoqda.

Aftidan, Ronaldu superyulduz maqomi allaqachon o‘tmishda qolgani bilan murosaga kelishi kerak. Uning oldidagi yo‘llar: Yevropa Ligasida bir yil o‘ynab, klubini Chempionlar Ligasiga qaytishiga yordam berishga harakat qilish. Yoki «Milan»da 1,5 mln yevrolik shartnomani imzolagan Zlatan Ibrahimovich kabi maoshining qisqarishiga rozi bo‘lish. Endi Ronaldu bir vaqtning o‘zida ikkita stulda o‘tira olmaydi.