Farg‘onada 2 nafar bloger ma’muriy ish doirasida 15 sutkaga qamaldi

Ma’lum qilinishicha, Komiljon Ahmedov o‘zining Facebook'dagi «Qo‘qonjonim» kanalida «Qo‘qon shahrida noqonuniy cherkov faoliyat olib bormoqda» sarlavhali post qoldirgan. Ushbu postni bloger Olimjon Haydarov ham o‘zining sahifasida qayta ulashgan. Keyinroq ikkala blogerlar ham mazkur postlarni o‘chirib tashlagan.

Shundan so‘ng, postda nazarda tutilgan Qo‘qon shahridagi «Vozrojdeniye» nomli «Yevangel» xristianlari cherkovi pastori A.Ayrapetov tomonidan Qo‘qon shahar IIBga shikoyat qilinadi.

Tergovga qadar tekshiruv davomida, Qo‘qon shahrida joylashgan mazkur cherkov 2019 yildan boshlab Adliya vazirligidan ro‘yxatdan o‘tib, rasmiy faoliyat yuritib kelayotgani ma’lum bo‘lgan. Shuningdek, blogerlar tomonidan tarqatilgan postdagi matn Din ishlari bo‘yicha qo‘mitaning ekspertiza xulosasiga ko‘ra, davlat idoralari vakillari faoliyatiga noto‘g‘ri baho berish holati hamda islom diniga e’tiqod qiluvchi fuqarolarda xristian diniga e’tiqod qiluvchi fuqarolarga nisbatan diniy adovatni targ‘ib qiluvchi xususiyatlar mavjud, deb topilgan.

22 iyul kuni jinoyat ishlari bo‘yicha Qo‘qon shahar sudi tomonidan ko‘rilgan ishda K.Ahmedov haqiqatan ham o‘zining «Qo‘qonjonim» kanalida yuqoridagi postni joylaganini, biroz vaqt o‘tganidan so‘ng ushbu postni o‘chirib tashlaganini va holat tegishli organlar tomonidan nazoratga olinishi so‘raganini aytgan.

O.Haydarov esa sudda bunday post joylamaganini ta’kidlagan.

«Sudda huquqbuzar O.Haydarov haqiqatan ham raqamiga rasmiylashtirilgan «Olimjon Haydarov» nomli akkaunti orqali «Olimjon Haydarov» nomli kanal ochganini, ushbu kanalga turli mavzuda postlar qo‘yib kelishini, 2022 yil 26 iyun kuni «Facebook» ijtimoiy tarmog‘ida Farg‘ona viloyati, Qo‘qon shahri, Chust ko‘chasida joylashgan noqonuniy Rus cherkovi to‘g‘risidagi xabarga ko‘zi tushganini, lekin u «Facebook» ijtimoiy tarmog‘iga joylamaganini, uning nomidan boshqa bir shaxs qo‘ygan bo‘lishi mumkinligini, u diniy adovatni targ‘ib qiluvchi materiallarga munosabat bildirib post qoldirganini, ushbu diniy holatni nazoratga olishlarini so‘raganini, ushbu noma’lum shaxs tomonidan qo‘yilgan postdagi matnlar noto‘g‘ri ekanini, xulosa boshqa kanaldan olinganini, «Qo‘qonjonim» kanaliga aloqasi yo‘qligini aytib ko‘rsatuv berdi.

Garchand, K.Ahmedov sodir etgan huquqbuzarligiga iqror bo‘lib, O.Haydarov iqror bo‘lmasdan ko‘rsatuv bergan bo‘lsa-da ularning sodir etgan huquqbuzarligi ish hujjatlaridagi tushuntirish xatlari, ekspertiza xulosasi, telefon apparatidan olingan va skrinshot qilingan fotosuratlar va ish bo‘yicha to‘plangan boshqa obektiv dalillar bilan to‘liq o‘z isbotini topgan», - deyiladi Oliy sud matbuot xizmati tomonidan Kun.uz'ga taqdim qilingan sud qarorining nusxasida.

Yuqoridagilarga asoslanib, fuqarolar Komiljon Ahmedov va Olimjon Haydarovlar O‘zbekiston Respublikasi MjtKning 184-3-moddasida nazarda tutilgan huquqbuzarlikni sodir etgan deb topilgan va ularning ikkalasiga ham o‘n besh sutkadan ma’muriy qamoq jazosi tayinlangan.

Shuningdek, qarorda qamoqda saqlangan kunlari uchun 675 ming so‘mdan qamoq xarajatlar huquqbuzarlardan undirilishi ko‘rsatilgan.

Oliy sud matbuot xizmati boshlig‘i Aziz Obidovning Kun.uz'ga ma’lum qilishicha, fuqarolar yoki ularning advokatlari 23 iyul 11:00 holatiga ko‘ra, sud hukmi yuzasidan apellyatsiya shikoyati bermagan.