Afg‘onistondagi jangovar harakatlarda qatnashganlar farzandi kvota asosida OTMga kirishi uchun tavsiyanomalar beriladi

1978-1989 yillarda Afg‘oniston hududidagi jangovar harakatlarda qatnashgan fuqarolar farzandlarini kvota asosida respublika oliy ta’lim muassasalariga o‘qishga kirishi uchun tavsiyanomalar berish tartibi to‘g‘risidagi nizom tasdiqlanadi.

Belgilanishicha:

tavsiyanomalar 1978-1989 yillarda Afg‘oniston hududidagi jangovar harakatlarda qatnashgan fuqarolarning farzandlariga beriladi;

tavsiyanomalar blankalarini tayyorlash va topshirish Mudofaa vazirligi tomonidan davlat budjeti parametrlarida har yili ushbu vazirlik uchun nazarda tutiladigan mablag‘lar hisobiga Markaziy bankning “Davlat belgisi” davlat unitar korxonasida amalga oshiriladi.

Vazirlar Mahkamasi qarori bilan tasdiqlangan oliy ta’lim muassasalari bakalavriatiga talabalarni o‘qishga qabul qilish tartibi to‘g‘risidagi nizom quyidagi tahrirdagi band bilan to‘ldiriladi:

“1978-1989 yillarda Afg‘oniston hududidagi jangovar harakatlarda qatnashgan fuqarolar farzandlari uchun oliy ta’lim muassasalari bakalavriati kunduzgi ta’lim shaklidagi ta’lim yo‘nalishlariga davlat granti asosida belgilangan umumiy qabul kvotalari ikki foizi miqdorida davlat granti asosidagi qo‘shimcha qabul kvotalari ajratiladi.

Ajratilgan davlat granti asosidagi qo‘shimcha ikki foizli kvota doirasida Mudofaa vazirligi tomonidan berilgan tavsiyanomaga ega bo‘lgan 1978-1989 yillarda Afg‘oniston hududidagi jangovar harakatlarda qatnashgan fuqarolar farzandlari to‘plagan ball bo‘yicha ro‘yxatdan o‘tishda birinchi sifatida tanlagan oliy ta’lim muassasalari kunduzgi ta’lim shakli bo‘yicha bakalavriat ta’lim yo‘nalishiga talabalikka tavsiya etiladi.

Ajratilgan davlat granti asosidagi qo‘shimcha (ikki foizli) kvota o‘rinlariga qabul qilinmagan abituriyentlar to‘plagan ball bilan o‘zlari tanlagan bakalavriat ta’lim yo‘nalishlarida umumiy tartibda tanlovda ishtirok etadilar”.