Xorijdan o‘qishni ko‘chirish bo‘yicha test sinovlari 23-25 avgust kunlari o‘tkaziladi

Davlat test markazi xabariga ko‘ra, test sinovlari ochiq maydonlarda tashkil etiladi va 23 avgust kuni boshlanib, 25 avgust kuni 1-smenada yakunlanadi. Bunda test sinovlari: 1-smenada 08:00 dan 11:00 ga qadar; 2-smenada 18:00 dan 21:00 ga qadar bo‘lib o‘tadi.

Test sinovlari 2 ta mutaxassislik va 3 ta majburiy fan bo‘yicha o‘tkaziladi hamda talabgorlarga mutaxassislik fanlarida 20 tadan, majburiy fanlarda 10 tadan jami 70 ta test topshirig‘i va ularni ishlash uchun 3 soat vaqt ajratiladi.

Test sinovlarida to‘plash mumkin bo‘lgan maksimal ball – 189 ball bo‘lib, har bir to‘g‘ri javob uchun mutaxassislik fanlarida 3,15 balldan, majburiy fanlarda 2,1 balldan beriladi.

Talabgorlar test sinovida ishtirok etish uchun ruxsatnomani Davlat test markazi my.dtm.uz saytidan olishi mumkin.

Talabgorlardan test sinovi o‘tkaziladigan hududga belgilangan vaqtdan kamida 1 soat oldin shaxsini tasdiqlovchi hujjat va test sinovida ishtirok etish uchun ruxsatnoma bilan kelishlari so‘ralgan.