London rossiyaliklarga viza berishni to‘liq taqiqlash taklifini rad etdi

Britaniya hukumati Rossiya fuqarolariga viza berishni to‘liq taqiqlash taklifiga qarshi chiqdi. Buyuk Britaniya mudofaa vaziri Ben Uolles 24 avgust, chorshanba kuni BBC Radio 4 radiosi efirida shunday dedi: «Umumiy taqiq to‘g‘ri yo‘l ekanligiga ishonchim komil emas».

Shu bilan birga, Uolles ruslarning kirishi uchun shart-sharoitlarni kuchaytirish zarurligiga ishonyapti. Uning ta’kidlashicha, «oligarxlarning xotinlari, rossiyalik yuqori martabali amaldorlarning Gretsiyada yoki Fransiya janubida ko‘ngilxushlik qilishi, shu vaqtda ularning armiyasi Ukrainada harbiy jinoyatlar sodir etayotganini kuzatish yoqimsiz».

Bu muammoning ildizlari 2014 yilga borib taqaladi, deya qo‘shimcha qildi Britaniya Mudofaa vazirligi rahbari Qrim annexia qilinganidan keyin va Donbassda mojaro boshlanganidan keyin YeI mamlakatlari harakatlari bir-biriga mos kelmaganini eslatib. «Rossiya Qrimga bostirib kirdi, uni noqonuniy ravishda qo‘shib oldi, keyin esa ba’zi davlatlar bu siyosatni davom ettirishga ruxsat berdi, go‘yo hech narsa o‘zgarmagandek», - dedi Ben Uolles.

Bir necha hafta oldin Ukraina prezidenti Volodimir Zelenskiy G‘arbni ruslarning mamlakatga kirishini taqiqlashga chaqirdi. YeIda Boltiqbo‘yi davlatlari, Finlandiya va Polsha, shuningdek, Daniya RF fuqarolari uchun turistik shengen vizalarini bekor qilishni yoqladi. Rossiyaliklarga sayyohlik vizalari berish taqiqlanishiga qarshi bo‘lgan Germaniya kansleri Olaf Shols urushga qarshi bo‘lgan ruslar o‘z mamlakatlarini tark etishi kerakligini aytdi. Bundan tashqari, Yevropa diplomatiyasi rahbari Jozep Borrel ham xuddi shunday pozitsiyani bildirdi.

Kelgusi dushanba kuni Buyuk Britaniya 2020 yilda tarkibidan chiqqan YeI mamlakatlari tashqi ishlar vazirlari bunday harakatni Rossiyaning Ukrainaga qarshi davom etayotgan urushiga navbatdagi javob sifatida muhokama qiladi. 23 avgust kuni Litva tashqi ishlar vaziri Gabrielyus Landsbergis YeIga a’zo bo‘lgan va Rossiya bilan chegaradosh davlatlar, agar YeI bu boradagi cheklovlar bo‘yicha yagona qaror qabul qilmasa, rossiyalik sayyohlarning o‘z hududiga kirishini taqiqlashi mumkinligini aytdi. Uning eslatishicha, havo qatnovi to‘xtatilgach, rossiyaliklar Yevropa ittifoqiga asosan quruqlik chegaralari orqali kiryapti.