Xalqaro yo‘llar bo‘yida Box Parking xizmat ko‘rsatish obektlari tashkil etiladi

Vazirlar Mahkamasining “Xalqaro yo‘llar bo‘yida Box Parking xizmat ko‘rsatish obektlarini tashkil etish chora-tadbirlari to‘g‘risida”gi qarori loyihasi e’lon qilindi.

Qayd etilishicha, Box Parking obekt (loyiha)lari konteynerlardan tashkil etiladigan majmualar bo‘lib, tashkil etish (qurish) ishlari qisqa fursatda bajarilishi va tun-u kun, 24 soat umumiy ovqatlanish, maishiy xizmat faoliyatini ko‘rsatish, avtomobillar to‘xtash joyi, yuvinish xonasi, umumiy hojatxona, birinchi tibbiy yordam ko‘rsatish punkti, savdo do‘koni va boshqa xizmatlarni o‘z ichiga oladi.

Yangihayot tumanidan o‘tgan Toshkent aylanma yo‘li bo‘yida Box Parking xizmat ko‘rsatish yo‘l bo‘yi obekti barpo etilib, foydalanishga topshirilgan hamda Toshkent viloyatida Toshkent-Chinoz yo‘nalishi (M39 avtomobil trassasi 860-kilometri)da 8 ta konteynerdan iborat xizmat ko‘rsatish obektini qurish ishlarini boshlagan.

Toshkent viloyati Toshkent-Chinoz, Toshkent-Bo‘stonliq va Toshkent-Olmaliq avtomobil yo‘llari yoqasida xalqaro standartlarga muvofiq zamonaviy Box Parking xizmat ko‘rsatish yo‘l bo‘yi obektlarini joylashtirish imkoniyati aniqlangan.

Toshkent viloyati Toshkent-Chinoz, Toshkent-Bo‘stonliq va Toshkent-Olmaliq avtomobil yo‘llari yoqasida konteynerlardan iborat zamonaviy Box Parking xizmat ko‘rsatish yo‘l bo‘yi obektlarini tashkil etish loyihalari taklifiga rozilik beriladi.

Belgilanishicha:

• respublika xalqaro yo‘llari (A-380, A-378, A-376, A-373, M-39, M-37, M-34) bo‘yida bo‘sh yer maydonlari xatlovdan o‘tkazilgan holda ular avtotransport yo‘nalishlari faoliyatiga ta’sir qilmaydigan qismi Qoraqalpog‘iston Vazirlar Kengashi, viloyatlar va tumanlar hokimliklari zaxirasiga o‘tkaziladi;
• Qoraqalpog‘iston Vazirlar Kengashi, viloyat va tuman hokimliklari, Kadastr agentligi, Davlat aktivlarini boshqarish agentligi, Qishloq xo‘jaligi vazirligi, Avtomobil yo‘llari qo‘mitasi bilan birgalikda xalqaro yo‘llar bo‘yida Box Parking xizmat ko‘rsatish obektlarini joylashtirish manzil (dislokatsiya)larini aniqlaydi hamda belgilangan tartibda aniqlangan yer maydonlarni hokimliklar zaxirasiga oladi;
• auksion savdolarida g‘olib deb topilgan tashabbuskorlarga yer maydonlarida Box Parking xizmat ko‘rsatish obektlari barpo etishga ruxsat beriladi;
• Iqtisodiy taraqqiyot va kambag‘allikni qisqartirish vazirligi, Qurilish vazirligi, Qoraqalpog‘iston Vazirlar Kengashi, viloyatlar va tumanlar hokimliklari xalqaro yo‘llar bo‘yida Box Parking loyihalariga ruxsat beriladigan faoliyat turlari ro‘yxatini tasdiqlaydi.