O‘rmon xo‘jaligi qo‘mitasi tizimidagi xodimlar uchun arzon uy-joylar quriladi

“O‘rmon xo‘jaligi tizimida mehnat qilayotgan xodimlarni ijtimoiy qo‘llab-quvvatlash chora-tadbirlari to‘g‘risida”gi hukumat qarori loyihasi e’lon qilindi.

Prezident qaroriga muvofiq O‘rmon xo‘jaligi davlat qo‘mitasi tizimidagi Darxon ilmiy-tajriba stansiyasi hududidan 2 gektar yer uchastkasi o‘rmon xo‘jaligi sohasida faoliyat yuritayotgan xodimlar, yosh malakali kadrlarni ijtimoiy qo‘llab-quvvatlash maqsadida ko‘p qavatli arzon uy-joylar qurishga ajratilgan.

Prezident farmoniga muvofiq qishloq joylarda:

• ko‘p kvartirali uy-joylar qurilishini amalga oshiruvchi tadbirkorlik sub’yektlari elektron onlayn auksion savdolari yakunlariga ko‘ra aniqlanadi;
• ko‘p kvartirali uy-joy qurilishi elektron onlayn-auksion savdolarida g‘olib bo‘lgan tadbirkorlik sub’yekti tomonidan o‘z mablag‘lari, tijorat banklaridan olingan kreditlar va qonun hujjatlarida taqiqlanmagan boshqa manbalar hisobidan amalga oshiriladi;
• tortib kelinadigan va maydon ichki suv ta’minoti va kanalizatsiya tarmoqlari hamda avtomobil yo‘llarini qurish viloyat hokimliklari tomonidan markazlashtirilgan manbalar va mahalliy budjetlar mablag‘lari hisobidan amalga oshiriladi;
• prezident farmoniga muvofiq ko‘p kvartirali uy-joylar qurilishida “SS” va undan yuqori reyting bahosiga ega bo‘lgan qurilish tashkilotlari qatnashish huquqiga ega ekani belgilangan.

O‘rmon xo‘jaligi davlat qo‘mitasi, Qurilish vazirligining:

• Darxon ilmiy-tajriba stansiyasi hududidan 2 gektar yer uchastkasida ko‘p qavatli arzon uy-joylar qurish bo‘yicha buyurtmachi etib – O‘rmon xo‘jaligi davlat qo‘mitasini belgilash;
• ko‘p kvartirali uy-joylar qurilishini amalga oshiruvchi tadbirkorlik sub’yektlarini elektron onlayn auksion savdolari yakunlariga ko‘ra aniqlash;
• pudratchi tomonidan loyiha ishlarini qonunchilikda belgilangan tartibda amalga oshirish;
• ko‘p kvartirali uy-joy qurilishi pudrat o‘z mablag‘lari, tijorat banklaridan olingan kreditlar va qonun hujjatlarida taqiqlanmagan boshqa manbalar hisobidan amalga oshirgan holda arxitektura va shaharsozlik normalariga to‘liq javob beradigan, zamonaviy turar joy majmuasini 2023 yil oxiriga qadar qurib bitkazish to‘g‘risidagi takliflari ma’qullanadi.