OAV: Rossiyada harbiy ishlab chiqarish sanksiyalar oqibatini yumshatyapti

G‘arb sanksiyalariga qaramay, iyul oyida Rossiyada «tayyor metall buyumlar» ishlab chiqarish o‘tgan oylardagi keskin pasayishdan so‘ng, o‘tgan yilga nisbatan deyarli 30 foizga oshdi, deb xabar berdi Bloomberg 15 sentabr, payshanba kuni. Uning baholashicha, harbiy ishlab chiqarish, aftidan, Rossiya sanoati yuksalishiga hissa qo‘shib, iqtisodiyotning sanksiyalar fonida tahlilchilar prognoz qilganidan yaxshiroq rivojlanishiga yordam beryapti. «Boshqa mashina va uskunalar» ishlab chiqarish ham muvaffaqiyatli rivojlanmoqda. Bularga kemalar, samolyotlar va zirhli texnikalar kiradi, deya qayd etgan agentlik. 

Iyul oyidagi ma’lumotlar harbiy-sanoat kompleksidagi davlat buyurtmalari Rossiya ishlab chiqarishini qo‘llab-quvvatlayotganini tasdiqlaydi, dedi Oxford Economics eksperti Tatyana Orlova. Bloomberg ma’lumotiga ko‘ra, «Uralvagonzavod»da mudofaa ishlab chiqarishida band bo‘lgan xodimlar 12 soatlik ish kuniga o‘tgan, agar xohlashsa, shanba kuni ham sakkiz soatlik smenada ishlashi mumkin. «Agar urush bo‘lmaganida, ishlab chiqarish sanoatining ko‘rsatkichlari ancha yomonroq bo‘lar edi», dedi Orlova. 

Iyul oyida prezident Vladimir Putin armiya uchun maxsus iqtisodiy chora-tadbirlar to‘g‘risidagi qonunni imzoladi. Uning taklifiga ko‘ra, hokimiyat fuqarolar armiya ehtiyojlari uchun dam olish kunlari va tungi vaqtda kompensatsiyasiz ishlashi kerak bo‘lgan rejim o‘rnatish huquqiga ega. 

Bloomberg agentligining ta’kidlashicha, hukumat ba’zi asosiy statistik ma’lumotlarni e’lon qilishni to‘xtatib, oylik raqamlarni oshkor qilmaganidan so‘ng, Rossiya iqtisodiyoti turli budjet moddalari, jumladan, mudofaa xarajatlari bo‘yicha aniq ma’lumotlarni olish yanada qiyinlashdi.

Shu bilan birga, nashrning yozishicha, mudofaa sanoatining iqtisodiy tiklanishi qisqa muddatli bo‘lishi mumkin, bu agar boshqa tarmoqlardan ishchi kuchi kirib kelsa, sanksiyalar esa Rossiya harbiy mashinasini zaiflashtirib, uni butlovchi qismlar va texnologiyalardan mahrum qilsa yuz beradi. Shu bilan birga, Rossiya Ukrainadagi urush hayot-mamot jangiga aylanib ketsa o‘z ehtiyojlarini qondira olishi aniq emas.

Avvalroq, 1 sentabr kuni Rossiya bosh vazirining sobiq o‘rinbosari Alfred Kox safarbarlik iqtisodiyoti inqirozning davosi ekani haqidagi sovet ittifoqi afsonasini to‘g‘ri deb hisoblamasligini aytdi. 

«O‘ylaymanki, Putin bo‘lmasa ham, hech bo‘lmaganda Nabiullina buni yaxshi tushunadi va shuning uchun iqtisodiyotni safarbarlik holatiga o‘tkazishga yo‘l qo‘ymaydi. Qurol-yarog‘ sanoatini xohlagancha boshqarish mumkin, ammo Rossiyada savdo va qishloq xo‘jaligi bozorga asoslangan va bu yaxshi, sababi kuchli ocharchilik xavfini kamaytiradi. Aslida, har qanday inqirozga to‘g‘ri javob - bozorga chiqish qobiliyatining oshishi, safarbarlik relslari esa - boshi berk ko‘cha», dedi Alfred Kox Vilnyusda.