Kasb-hunar maktablarida maishiy texnikalarga xizmat ko‘rsatishga o‘qitish yo‘lga qo‘yiladi

O‘zbekistondagi kasb-hunar maktablarida maishiy texnikalarga xizmat ko‘rsatishga o‘qitish yo‘lga qo‘yiladi. Bu haqda prezident raisligida o‘tkazilgan yig‘ilishda tegishli topshiriq berildi.

Yig‘ilishda elektrotexnika mahsulotlarini ishlab chiqarish va eksportini kengaytirish maqsadida "O‘zeltexsanoat" uyushmasi va Investitsiyalar va tashqi savdo vazirligiga:

Toshkent viloyatida elektr jihozlari ishlab chiqarish bo‘yicha 58 million dollarlik 14 ta loyihani;
Farg‘ona viloyatida maishiy texnika va kabel simlari ishlab chiqarish bo‘yicha 56 million dollarlik 9 ta loyihani;
Andijon viloyatida 34 million dollarlik maishiy texnika ishlab chiqarish bo‘yicha 8 ta loyihani ishga tushirish topshirildi.

Sirdaryo, Namangan, Navoiy, Surxondaryo va Xorazm viloyatlari hokimlariga bir oy muddatda 100 million dollarlik loyihalar to‘plamini shakllantirishga topshiriq berildi.

Kelgusi yildan boshlab Innovatsion rivojlanish vazirligi elektronika va mikro-elektronika yo‘nalishida ilmiy, tajriba-konstruktorlik va startap loyihalarni moliyalashtirish uchun grant ajratib borishi belgilandi.

Bosh prokuratura, Bojxona va Soliq qo‘mitalariga maishiy texnikalar noqonuniy aylanmasi va kontrabandasiga yo‘l qo‘ymaslik ustidan nazoratni kuchaytirish topshirildi.

Mutasaddilarga yirik ishlab chiqaruvchilar bilan birga hududlardagi kasb-hunar maktablarida maishiy texnikalarga xizmat ko‘rsatishga o‘qitishni yo‘lga qo‘yish topshirildi.

#texnika #hunar