«Arsenal» derbida g‘alaba qozondi, Trossar «Liverpul»ga het-trik yo‘lladi, Messidan shedevr

Angliya: «Arsenal» derbida g‘alaba qozondi

Arsenal – Tottenhem – 3:1
Gollar: 1:0 – 20 Parti, 1:1 – 31, penalti Keyn, 2:1 – 49 Gabriel Jyezus, 3:1 – 67 Jaka.
Arsenal – Remsdeyl, Uayt, Gabriel, Saliba, Zinchenko (Tirni, 73), Jaka, Parti (Lokonga, 73), Edegor (Fabiu Viyeyra, 80), Saka, Gabriel Jyezus (Nketia, 80), Martinelli.
Tottenhem – Loris, Emerson, Dayyer, Langle (Sanches, 71), Romero, Perishich (Bissuma, 71), Xeyberg (Skipp, 75), Bentankur, Son Xyn Min (Doerti, 72), Keyn, Risharlison (Sessenon, 71).
Ogohlantirishlar: Saliba (78), Martinelli (85).
Chetlatish: Emerson (62).

«Tottenhem» birinchi bo‘limning katta qismini o‘z tomonida o‘tkazdi. Bu «Arsenal»ning ustunlik qilish istagi tufayli ham, Antonio Konte ikkinchi raqam ostida o‘ynashni xush ko‘rishi va buni yaxshi uddalashi tufayli ham  bo‘ldi. Onda-sonda qilingan hujumlardan birida Risharlison yaqin masofadan zarba berdi, ammo Ramsdeyl gol bo‘lishiga yo‘l qo‘ymadi.

Partey jarima maydoni tashqarisidan yo‘llagan ajoyib zarbasi bilan to‘pni darvozaning yuqori burchagiga joylashtirganida mehmonlarning rejasi barbod bo‘lgani ma’lum bo‘ldi. Ammo «Tottenhem» raqib hujumlarining navbatdagi to‘lqiniga turib berdi va qarshi hujum uyushtirdi, uning yakunida Risharlison penalti ishladi, Keyn uni aniq ijro etdi. Shu tariqa bu forvard APLda safar o‘yinlarida 100 gol urgan birinchi futbolchiga aylandi va London derbilarida gol urish bo‘yicha Terri Anrining rekordini (44) yangiladi.

Umuman olganda, o‘yin ancha tomoshabop kechdi va «Tottenhem»ning qarshi hujumlari ham «kanonirlar»ning harakatlari kabi zavqli chiqdi. Ikkinchi bo‘lim boshida Gabriel Jyezus jarima maydoni ichida Llorisni ojiz qoldirdi - fransiyalik darvozabon Sakaning murakkab zarbasini qaytargandi, braziliyalik hujumchi qaytgan to‘pni darvozaga joylab qo‘ydi.

Emerson keraksiz vaziyatda, maydon markazida Martinellini tepib, qizil kartochka olgach, mehmonlar yanada qiyin ahvolda qolishdi. Martinelli futbol maydonida qasd oldi va Chakaning goliga hammualliflik qildi. Shundan keyin o‘yin masalasi amalda hal bo‘ldi: «Arsenal» «Tottenhem» bilan oradagi farqni to‘rttaga oshirdi va yakshanba kuni bo‘lib o‘tadigan Manchester derbisida qanday natija qayd etilishidan qat’i nazar birinchi o‘rinni saqlab qoladigan bo‘ldi.

Liverpul – Brayton 3:3
Gollar: 0:1 – 4 Trossar, 0:2 – 17 Trossar, 1:2 – 33 Firmino, 2:2 – 54 Firmino, 3:2 – 63, avtogol Uebster, 3:3 – 83 Trossar.
Liverpul – Alisson, Aleksander-Arnold, Matip, van Deyk, Tsimikas (Milner, 59), Henderson (Elliott, 59), Tiago Alkantara (Nunes, 89), Fabino, Karvalyu (Dias, 46), Firmino (Diogu Jota, 75), Saloh.
Brayton – Sanches, Dank, Uebster, Veltman, Estupinyan (Lallana, 76), March, Gross (Mitoma, 65), Mak Allister, Kaysedo, Uelbek, Trossar (Lempti, 87).

Grem Potter «Chelsi»ga o‘tib ketgan, «Brayton» esa hamon har qanday raqibga muammolar tug‘dirishda davom etmoqda. Hatto «Liverpul»ga «Enfild»dagi o‘yinda ham. O‘yinning 4-daqiqasidayoq Uelbekning tovon bilan bergan pasidan keyin Trossar hisobni ochdi. Yurgen Klopp uchun bu uyg‘otuvchi qo‘ng‘iroq emas, bong urilishi edi, chunki «chaykalar» bitta golga qanoat qilmoqchi emasdi. Trossar tez orada ikkinchi golni urdi, agar Alisson bo‘lmaganida, bu o‘yin qizillar uchun o‘ta qayg‘uli yakunlanishi mumkin edi.

Mezbonlar bo‘limning ikkinchi yarmida faollashdi va Salohning pasidan Roberto Firmino hisobni qisqartirdi, vaziyatga VAR aralashib, misrlik futbolchida ofsayd qayd etgan bosh hakamning birinchi qarori tuzatildi. Ikkinchi bo‘lim boshida esa braziliyalik futbolchi mehmonlar mudofaasini dog‘da qoldirib hisobni tenglashtirdi, bundan biroz avvalroq «Liverpul» uchinchi golni o‘tkazib yuborishiga bir baxya qolgandi.

Qizil iblislar uchun bu mavsum qiyin kechmoqda xarakter ko‘rsatish talab etilmoqda. Ammo na iroda va na Alissonning seyvlari muvaffaqiyatni kafolatlay olmaydi. Aleksandr-Arnold bu o‘yinda ham o‘z an’anasiga sodiq qolib, o‘yinni qo‘pol xatolarsiz o‘tkaza olmadi. Het-trik qayd etgan Trossar esa «Enfild»da APL o‘yinlarida faqat Ndlovu va Andrey Arshavin qila olgan (rossiyalik futbolchi pokerga erishgandi) ishni uddaladi, u o‘z gollaridan biriga Trentni hammuallif deb sanasa ham bo‘ladi.

Kristal Pelas – Chelsi 1:2
Gollar: 1:0 – 7 Eduar, 1:1 – 38 Obameyang, 1:2 – 90 Gallaher.
Kristal Pelas – Guaita, Klayn (Tomkins, 44), Uord, Gexi, Mitchell, Eze (Shlupp, 74), Dukure (Xyuz, 84), Olise, Ayyu, Zaa, Eduar (Mateta, 84).
Chelsi – Arrisabalaga, Djyeyms, Tiago Silva, Fofana, Chiluell, Kovachich, Jorjino (Loftus-Chik, 56), Maunt (Pulishich, 84), Haverts (Gallaher, 76), Obameyang (Broya, 75), Sterling.

«Chelsi» Tomas Tuxelning iste’fosidan keyin ilk g‘alabasiga erishdi, lekin bunda nafaqat mahorat, balki iroda ko‘rsatish ham talab etildi. Tez o‘tkazib yuborilgan golga ko‘klar Obameyangning goli bilan javob qaytardi, gabonlik hujumchi APLda 344 kundan buyon gol urmayotgandi. U Tiagu Silva tashlab bergan to‘pni darvozaga orqa turgan holda qabul qilib oldi va aylanib zarba berdi. Lekin bu o‘yinda braziliyalik faxriy futbolchiga savollar tug‘ildi. Aniqrog‘i, arbitrga, u qo‘l bilan o‘ynagan futbolchini maydondan chetlatishi mumkin edi. Ammo VAR xonasidagi tekshiruvga qaramay, u bunday qaror qabul qilmadi.

O‘yinning oxirgi daqiqalarida esa ko‘klar jamoasi muxlislari Gallaherning uzoq masofadan bergan aniq zarbasidan bahra olishdi. Barcha hissiyotga berildi, ammo o‘z faoliyatining eng yaxshi damlarini «Kristal Pelas»da ijara asosida o‘tkazgan yarimhimoyachining o‘zi golini nishonlamadi.

Ispaniya: «Sevilya» cho‘kmoqda

Sevilya — Atletiko 0:2
Gollar: Lorente (29), Morata(57).
Sevilya – Bunu, Karmona, Nyanzu (An-Nosiri, 67), Salas (Navas, 46), Rekik (Telles, 28), Dileyni (Rakitich, 46), Gudel, Isko, Lamela, Oliver Torres (Gomes, 67), Dolberg.
Atletiko – Oblak, Molina (Felish, 87), Savich, Ximenes, Reynildu, Lorente, Koke (Kondogbia, 73), Vitsel, Saul (Karrasko, 61), Morata (Grizmann, 61), Kunya (Korrea, 72).
Ogohlantirishlar: Isko (11), Dileyni (31), Vitsel (38), Gudel (81), Felish (90+3).

So‘nggi yillarda «kuchli uchlik»dagi klublar bilan yonma-yon yurgan «Sevilya» — bu mavsumdagi eng ishonchni oqlamagan jamoa bo‘lmoqda. Yetti turdan keyin bir g‘alaba va besh ochko — yozdayoq iste’fosi so‘rala boshlangan Xulen Lopetegi jamoasi uchun juda yomon ko‘rsatkich. O‘shanda bu faqat mish-mishlar bilan cheklangandi, ammo hozir murabbiy ligada iste’fo uchun asosiy nomzod bo‘lib turibdi.

«Atletiko» bilan o‘yin avvalboshdan andalusiyaliklarga yaxshi natija va’da qilmadi. «Matraschilar»da ham mavsum bir tekisda ketmayapti, lekin ular tanaffusdan keyin kuchliroq bo‘lib qaytishganini namoyish etishdi, Morata esa bu raqibga qarshi qatorasiga uchinchi o‘yinda gol urdi. «Sevilya» agar hozirgi tempda davom etsa, 1996/97 yilgi mavsum natijasi takrorlanadi, o‘shanda jamoa segundaga tushib ketgandi.

Malorka — Barselona 0:1
Gol: Levandovski (20).
Barselona – ter Stegen, Balde, Pike, Kristensen, Alba (Roberto, 80), Buskets, Kessie (Pedri, 67), Gavi, Levandovski, Dembele (Torres, 80), Fati (Rafinya, 67).
Ogohlantirishlar: Kristensen (39), Pike (40), Kosta (42), Kessie (45), Buskets (74), Valent (83).

Terma jamoalar o‘yinlari uchun ajratilgan tanaffus «Barselona» uchun dahshatli tushga aylandi, Xavi Depay, Frenki de Yong, Kunde va Arauxosiz qoldi, Arauxo JCh-2022 turnirini ham o‘tkazib yuboradi. Shu tufayli Malorkada boshlang‘ich tarkibda bir oydan buyon o‘ynamayotgan Pike va Jordi Alba ham o‘rin oldi.

Levandovski qatorasiga oltinchi turda gol urdi, u bir fint bilan himoyachini yo‘ldan oldi va to‘pni uzoq burchak tomon yo‘naltirdi, ammo o‘yinda mehmonlar total ustunlikka erisha olishmadi. «Malorka» vaqti-vaqti bilan kataloniyaliklar himoyasini bezovta qilib turdi va Ter Shtegen faqat omad tufayli qatorasiga beshinchi o‘yinda darvozasi daxlsizligini saqlab qola oldi.

Ammo asosiysi, g‘alabali seriya davom ettirildi, Xavi esa la ligada qatorasiga 18 safar o‘yinida mag‘lub bo‘lmasdan, Zinedin Zidanning rekordini yangiladi.

Italiya: Mourino «Inter» bilan bog‘liq kompleksni yengib o‘tdi

Inter – Roma 1:2
Gollar: 1:0 – 30 Dimarko, 1:1 – 39 Dibala, 1:2 – 75 Smolling.
Inter – Xandanovich, Dumfris (Bellanova, 81), Acherbi, Shkrinyar, Bastoni (Gozens, 81), Dimarko (Karboni, 88), Chalxono‘g‘lu (Korrea, 77), Barella, Aslani (Mxitaryan, 77), Jyeko, Martines.
Roma – Ruy Patrisiu, Chelik, Smolling, Manchini, Rojyer, Spinatssola, Matich, Kristante, Dzanolo (Belotti, 86), Pellegrini (Kamara, 81), Dibala (Abraham, 58).
Ogohlantirishlar: Dzanolo (54), Manchini (61), Smolling (65), Aslani (72), Korrea (87), Gozens (90), Barella (90).

O‘tgan mavsumda Joze Mourino sobiq jamoasiga qarshi uchta o‘yinni ham (kubok o‘yini bilan birga) boy bergandi va bu o‘yinlardan biridan so‘ng futbolchilarni xaraktersizlikda va top-raqiblar bilan o‘ynashdan qo‘rqishda ayblagandi. Bu o‘yin boshida ham rimliklar bunday muammodan qutula olmagandek ko‘rindi.

Jyekoning goli videotakrordan keyin bekor qilingani mehmonlarni yengil tin oldirdi, ammo ko‘p o‘tmay Barellaning pasi o‘tgan haftada Millatlar ligasida terma jamoada o‘zini a’lo darajada namoyish etgan Dimarkoning goliga aylandi. Ammo hozirgi «Roma» o‘tgan yilgisidan mustahkamroq bo‘lib chiqdi. Qolaversa, jamoaga mahoratli futbolchilar kelib qo‘shilgan, buni Dibalaning gollari ko‘rsatib turibdi.

Yozda argentinalik hujumchini Milanda kutishgandi, endi esa tribunalar uning muvaffaqiyatiga hushtakbozlik qilishmoqda, u almashtirilayotganida ham hushtaklar bilan kuzatib qo‘yishdi. Faqat Dibala va uning sheriklarini bu bilan yengib bo‘lmasdi. Rimliklar ikkinchi bo‘limda «Inter»ning barcha hujumlarini to‘xtatishdi va standart vaziyatda o‘z imkoniyatidan foydalanishdi, Smolling Pellegrinining uzatmasidan g‘alaba golini urdi. «Roma» yetakchilarga yaqinlashdi, «Inter» esa 10 yil ichida ilk bor startdagi sakkiz o‘yinda to‘rt bor mag‘lub bo‘ldi va jamoa ayni vaqtda yevrokubok hududidan tashqarida qolmoqda.

Empoli — Milan 1:3
Gollar: Bayrami (90+2) — Rebich (79), Ballo-Ture (90+4), Leau (90+7).
Milan – Teterushanu, Kalabriya (Kalulu, 39), Ker (Dest, 73), Tomori, Ballo-Ture, Binnosir, Salemakers (Krunich, 33), Tonali, de Ketelare (Dias, 73), Jiru (Rebich, 73), Leau.
Ogohlantirishlar: Ker (24), Haas (26), de Vinter (56), Luperto (61), Dzanetti (81), Binnosir (90+1).

«Milan»da hamshaharlaridan farqli o‘laroq ishlar yaxshi ketmoqda, ammo «Empoli»ga qarshi o‘yinda muammolar yuzaga keldi. Mehmonlar juda qulay vaziyatlarni ko‘kka sovurishdi, keyin Salemakers va Kalabriya jarohat olib safdan chiqdi, ikkinchi bo‘lim davomida esa — Ker ham jarohat oldi. Endi Chempionlar ligasida Stefano Pioli uchun bosh og‘rig‘i kafolatlangan, lekin bu shanba kuni ham bor edi. Avvalgi turlarda asosiy darvozabon Menyan safdan chiqqani tufayli Teterushanu bir necha metrlardan yo‘llangan zarbalarni qaytarishiga to‘g‘ri keldi.

Milanliklar ikkinchi bo‘limda standart vaziyatlardan maksimum foyda chiqarishga harakat qildi. Ammo Jiruning jarima zarbasi to‘singa tegdi, Tonalining zarbasi rikoshet orqali murakkab yo‘nalish olganida esa Vikario aql bovar qilmas harakat bilan burchakka ketayotgan to‘pni olib chiqdi. Bu safar ham Rafael Leau qutqardi, aut tashlab berilganda himoyachilar ortiga yugurib o‘tgan hujumchi Rebichga ideal pas berdi.

Barchasi «Milan»ning navbatdagi qiyin g‘alabasiga qarab ketayotgandi, ammo o‘yin oxiri haqiqiy trillerga aylanib ketdi. Qo‘shimcha daqiqalarda jarima zarbasini ijro etgan Bayrami chempionlarga Menyan jamoa uchun qanchalik kerakligini eslatib qo‘ydi, uning o‘rniga o‘ynayotgan ruminiyalik darvozabon o‘zi turgan burchak tomon yo‘llangan zarbani o‘tkazib yubordi. Shunga qaramay rossoneri tezda tashabbusni qo‘lga oldi, avvaliga Krunich boshi bilan to‘pni darvoza qarshisida turgan Ballo-Turening oyog‘iga tashlab berdi, keyingi vaziyatda esa Leau qarshi hujumda raqibni jazoladi. «Milan»da hamon o‘sha-o‘sha aql bovar qilmas xarakter.

Germaniya: «Bavariya» bosimi ostida

Ayntraxt F – Union 2:0
Gollar: 1:0 – 12 Getse, 2:0 – 42 Lindstrem.

Juma kuni «Bayyer»ni yirik hisobda mag‘lub etib (4:0), «Bavariya» ikkinchi o‘ringa ko‘tarilgandi. Chempionlar yana bir bor Germaniyada kim zo‘rligini namoyish etmoqda, raqobatchilar esa — odatdagi kabi bosim ostida qaltiray boshladi. «Union» o‘z o‘yinini topib borayotgan va yevrokuboklar hududiga kirib kelgan «Ayntraxt» yo‘lidan chiqib, yutqazdi, Gyotse va Lindstryom o‘yin masalasini birinchi bo‘limdayoq hal qildi. «Union» birinchi o‘rinda qolayotgan bo‘lsa-da, «Bavariya» bilan oradagi farq ikki ochkogacha qisqargan.

Keln – Borussiya D 3:2
Gollar: 0:1 – 31 Brandt, 1:1 – 53 Kayns, 2:1 – 56 Tigges, 3:1 – 71 Lyubichich, 3:2 – 78, avtogol Shmits.

Berlinliklar fiaskosi ortidan Dortmundning «Borussiya»si yakkapeshqadamga aylanib olishi mumkin edi va jamoa «Kyoln»ga qarshi safar o‘yinini yaxshi boshlagandi. 19 yoshida jamoani sardor sifatida maydonga boshlab tushgan Bellingem o‘z pasi bilan Brandt maydon markazidan yorib kirib, hisobni ochishiga yordam berdi, ammo tanaffusdan keyin barchasi o‘zgarib ketdi. «Asalarilar» uch daqiqa ichida ikki gol qabul qilib olishdi, ikkinchi golni «Borussiya» 1,5 million yevro evaziga «Kyoln»ga sotib yuborgan Tigges urdi.

Frayburg – Mayns 2:1
Gollar: 1:0 – 3 Gregorich, 2:0 – 37 Kere, 2:1 – 52 Aaron Martin.

Natijada shanba kungi o‘yinlardan eng ko‘p foyda olgan jamoa «Frayburg» bo‘ldi. Bu jamoa yaqingacha birinchi o‘rinda borayotgandi, ammo ketma-ket duranglardan («Borussiya» M va «Hoffenhaym»ga qarshi o‘yinlar bir xil - 0:0 hisobida yakunlandi) keyin pozitsiyasini yo‘qotgandi. «Mayns»ni mag‘lub etib Kristian Shtrayx jamoasi ochkolar soni bo‘yicha «Union»ga yetib oldi va faqat qo‘shimcha ko‘rsatkichlar tufayli ikkinchi o‘rinda joylashgan. Uchinchi o‘ringa tushib qolgan «Bavariya» esa yakshanba kuni «Hoffenhaym» «Herta»ni mag‘lub etsa, yana uchlikdan tashqarida qolishi mumkin.

Fransiya: Messi ijrosidagi shedevr

PSJ — Nitssa 2:1
Gollar: Messi (29), Mbappe (83) — Labord (47).
PSJ – Donnarumma, Hakimi, Ramos, Markinos, Mukiyele, Bernat (Mendesh, 59), Ruis (Sanshesh, 72; Danilu, 88), Vitinya, Messi (Sarabiya, 88), Neymar, Ekitik (Mbappe, 59). 
Nitssa – Shmeyxel, Atal (Lotomba, 76), Dante, Rosario, Viti, Bar, Barkli (Pepe, 62), Diop, Remzi (Tyuram, 62), Lemina (Beka-Beka, 76), Labord (Delor, 84).
Ogohlantirishlar: Dante (27), Sarabiya (90+1).

Messi jarima zarbalarini ijro etish bo‘yicha master-klass ko‘rsatishda davom etadi. Shu kunlarda u terma jamoada shunday gol urgandi, endi esa — klub uchun. Argentinalikning zarbasidan keyin «Nitssa»da darvozani qo‘riqlayotgan Shmeyxel hatto o‘rnidan qo‘zg‘alishga ulgurmadi, ammo sobiq jamoasi Kristof Galteni qiynab qo‘ydi. Parijliklar faqat o‘yin oxiridagina Mbappe jarima maydoni markazida turib darvozani o‘qqa tutganidan keyingina vaziyatni o‘z tomoniga og‘dira oldi. Bu g‘alabadan keyin «PSJ» shu turda g‘alaba evaziga birinchi o‘ringa ko‘tarilgan «Marsel»ni yana quvib o‘tdi, Serxio Ramos esa liga 1 rekordini takrorladi. Ispaniyalik futbolchi tarkibda bo‘lganida jamoa 21 o‘yindan birortasida mag‘lub bo‘lmagan.

Messi freekick goal

They didn't deem him balon d'Or nomination worthy🙂 pic.twitter.com/vygiOpDcnV

— Oyindamola (@oyinda_10) October 1, 2022

Kun statistikasi

• «Kadis» yetti turda 1 gol urdi. Bunday yomon ko‘rsatkich so‘nggi bor 2001/02 yillar mavsumida  «Malorka»da kuzatilgan.
• «Leypsig» safida rasmiy o‘yinlarda 1-chi bo‘lib 100  gol urgan futbolchi Verner bo‘ldi.
• «Tottenhem» hujumchisi Keyn «Arsenal» darvozasiga urgan gollari sonini 14 taga yetkazdi. U bungacha «kanonirlar» uchun eng xavfli futbolchilar qatorida «Chelsi»ning sobiq hujumchisi Drogba bilan bir xil natija ko‘rsatib turgandi.
• Niderlandiya chempionatida yarimhimoyachi Klassen 100 ball (67 gol, 33 uzatma) to‘pladi. Bunday natijaga yana uch futbolchi erishgandi va ularning barchasi «Ayaks» futbolchilari — Luis Suares, Huntelar va Tadich.
• «Zalsburg» safida avstriyalik himoyachi Ulmer 370-o‘yinini o‘tkazdi va bu boradagi klub rekordini takrorladi.